Assambleıa Senat depýtattyǵyna kandıdattardy irikteýdiń ashyq rásimin ázirleýi kerek – Toqaev
«Jańa jaǵdaıda Assambleıa burynǵysynsha beıbitshilik pen kelisimdegi bizdiń saıasatta berik ınstıtýtsıonaldy tirek bolyp qyzmet ete beredi dep senemin. Búgingi sessııanyń maqsaty – saıası júıeniń reformasynda Assambleıanyń orny men rólin aıqyndaý, onyń ary qaraı damýynyń vektoryn belgileý», - dedi Prezıdent.
Osy oraıda Memleket basshysy jańa kezeńde Assambleıasy úsh negizgi basymdyqqa ekpin qoıýy tıis ekenin aıtty.
«Birinshiden, saıası reformalardy júzege asyrýda Assambleıanyń rólin kúsheıtý. Ózderińiz bilesizder, bıliktiń zańnamalyq tarmaǵynyń reforamasy aıasynda Assambleıanyń atynan depýtattar qazirgideı Májiliste emes, Senatta bolady. Májiliste Assambleıanyń kvotasyn qysqartý demokratııalyq saılaý standarttaryn saqtaýǵa qatysty birqatar máseleni sheshedi. Sonymen birge, Assambleıa atynan kelgen senatorlar jalpyulttyq ıntegratsııa men etnomádenı áralýandyq negizinde Qazaqstannyń etnıkalyq toptary múddeleriniń barsha jıyntyǵyn kórsetedi. Mundaı model halyqaralyq tájirıbe men Qazaqstannyń parlamenttik júıesiniń ereksheligin tıisti túrde tanytady», - dedi Qasym-Jomart Toqaev.
Prezıdenttiń aıtýynsha, jańa fýntsııa men Senattyń rólin eskere otyryp, Assambleıanyń depýtattyq mandattarynyń mańyzy arta túsedi. Sonymen qatar, Assambleıa Senat depýtattyǵyna kandıdattardy irikteýdiń tıimdi ári ashyq rásimin ázirleýi kerek.
«Osy máselelerdiń barlyǵy «Qazaqstan halqy Assambleıasy» týraly jańartylǵan zańda kórinis tabýy tıis», - dedi Memleket basshysy.
Osyǵan deıin QR Prezıdenti tóraǵalyǵymen Qazaqstan halqy Assambleıasynyń HHHІ sessııasy ashylǵanyn jazdyq.
