Assambleıa óndiris pen kásipkerlikke qoldaý kórsetýdi jalǵastyrady - Janseıit Túımebaev
Jıyndy Qazaqstan halqy Assambleıasynyń Kásipkerler qaýymdastyǵy Qazaqstannyń qaptaýshylar qaýymdastyǵymen birlesip uıymdastyrǵan.
«Tsellıýloza-qaǵaz ónerkásibi - qaǵaz-karton ónimderin alatyn tehnologııalyq protsester birigetin orman kesheniniń kóshbasshy salalarynyń biri. Alaıda, elimizdegi orman sektorynyń ekonomıkalyq áleýeti ózgerissiz qalyp otyr. Sebebi, orman sharýashylyǵy men aǵash óńdeý ınfraqurylymy damymaǵan, óndiristik qor tozǵan. Ekonomıkadaǵy orman sektorynyń damýyn anyqtaýda tsellıýloza-qaǵaz salasy mańyzdy ról atqarady. Tsellıýloza-qaǵaz kombınattary óndiristik aınalymǵa aǵash súrekterin salady da, joǵary qun qosylǵan ónimdi shyǵarady», - dedi QHA tóraǵasynyń birinshi orynbasary Janseıit Túımebaev forým ashylýynda.
Onyń aıtýynsha, qaǵaz óndirý men qaǵaz ónimderi salasynda 300-ge jýyq ónerkásip jumys isteıdi. Bul saladaǵy ekonomıka jyldan-jylǵa artyp keledi.
2018 jylǵy óndiris kólemi 2017 jylǵy kórsetkishten 5% kóbeıip, 58 mlrd teńgeden asqan.
«Qaptamaǵa kelsek, ol - taýardyń betkeustary. Qaptama tartymdy bolsa, ony satyp alýshylar da kóbeıedi. Kóptegen jaǵdaıda satyp alýshylar taýardy qajettilikten emes, qyzyqqannan alady. Jaqsy qaptama 5 sekýndtyq jarnamanyń rólin atqarady. Osylaısha, taýar qaptamasy marketıngtiń tıimdi quraly bolyp otyr. Sondyqtan atalǵan eki salaǵa memlekettik qoldaý kórsetý eksport áleýetin arttyrý úshin de mańyzdy. Qazaqstan halqy Assambleıasy aldaǵy ýaqytta da óndiriske, kásipkerlikke jáne ekonomıkaǵa qoldaý kórsetýge daıyn», - dedi Janseıit Túımebaev.
