Assambleıa ókilderi túzetý mekemesinde kontsert qoıyp, syılyq taratty
QYZYLORDA. QazAqparat-Búgin Qyzylorda oblysy boıynsha Qylmystyq atqarý júıesi departamentiniń ZK-169/5 túzetý mekemesi men ZK-169/1 ýaqytsha ustaý abaqtysynda Alǵys aıtý kúnine oraı oblystyq Qazaqstan halqy Assambleıasynyń ókilderimen kezdesý ótti, dep habarlady QazAqparat HAA tilshisi Assambleıaǵa silteme jasap.
Oǵan «Slavıane» qoǵamdyq mádenı-ortalyǵy» qoǵamdyq birlestiginiń, «Lev ami» evreı etnomádenı birlestiginiń, «Berkat» sheshen etnomádenı birlestiginiń músheleri, «Qoǵamdyq kelisim» kommýnaldyq memlekettik mekemesiniń qyzmetkerleri, 200-den astam jazasyn óteýshi jáne ýaqytsha ustaý ızolıatoryna jetkizilgen azamattar qatysty.
Sharada «Slavıane» qoǵamdyq birlestiginiń jetekshisi Galına Şerbakova kezdesýge qatysýshylardy Alǵys aıtý kúnimen quttyqtap, izgi tilekterin bildirdi.
Sondaı-aq, «Qoǵamdyq kelisim» KMM-niń bólim basshysy Erjan Ýáıis: «Alǵys aıtý kúni barlyq qazaqstandyqtarǵa degen qurmettiń ornyǵýyna negiz bolǵan kún dep bilemin. Bul - taǵdyr tálkegimen Qazaqstan aýmaǵyna eriksiz qonys aýdarǵan túrli etnostardyń mıllıondaǵan ókilderiniń qutty qonysyna aınalǵan qasıetti qazaq jeri men qonaqjaı qazaq halqyna taǵzym etetin kún. Mereıli mereke barshańyzǵa qutty bolsyn», - dep atap ótti.
Óz kezeginde etnomádenı birlestik músheleri merekege arnap kontsert qoıdy. Al, ZK-169/5 túzetý mekemesi men ZK-169/1 ýaqytsha ustaý abaqtysy tarapynan kelgen qonaqtarǵa syılyq berildi.
