Assambleıa músheleri qyzylaǵashtyqtarǵa kómek retinde 47 mln. teńge jeke qarjysyn bóldi - N. Nazarbaev
ASTANA. Qazannyń 20-sy. QazAqparat /Ernur Aqanbaı / - Qazaqstan halqy Assambleıasynyń músheleri Almaty oblysynyń Qyzylaǵash aýylynda bolǵan sý tasqynynyń saldaryn eńserý úshin 47 mln. teńge jeke qarjylaryn bóldi.
Bul týraly búgin Astanada ótip jatqan Qazaqstan halqy Assambleıasynyń HVІ sessııasynda Elbasy Nursultan Nazarbaev aıtty.
«Bizdiń Assambleıanyń tarıhy halyq pen eldiń shynaıy qýaty qandaı ekenin kórsetti. Mynadaı mysal keltirgim keledi. Aǵymdaǵy jyldyń kókteminde sý qoımasynyń buzylýynan Almaty oblysyndaǵy Qyzylaǵash aýyly qırady. Adamdar qaza taýyp, júzdegen otbasy úı-kúısiz qaldy. Bul qaıǵy árbir qazaqstandyqtyń júregin aýyrtty. Búkil el boıynsha adamdar qyzylaǵashtyqtar úshin kıim-keshekter, azyq-túlikter, qarajat jınaı bastady. Tek Assambleıa músheleri 47 mln. teńge jeke qarajattaryn bóldi. Oǵan aýylda balalardyń sport mektebi, mádenıet úıi salyndy. Aýyl qysqa merzim ishinde tolyǵymen qalpyna keltirildi»,- dedi Memleket basshysy.
Osy oraıda Prezıdent turǵyndar ózine jazǵan hatynda kórsetilgen kómekter úshin alǵys bildirip, búkil qazaqstandyqtardyń qaıǵylaryna ortaqtasqandary úshin rızashylyqtaryn jetkizgenin atap kórsetti.
«Bizdiń azamattarymyz Shyǵys Qazaqstandaǵy sý tasqynynan zardap shekkenderge dál osylaı kómektesti»,- dedi Prezıdent.
Osy oraıda Elbasy bıyl álemde tabıǵat apattarynan júzdegen myń adamdar zardap shekkenin atap kórsetti. «Olardyń basym kópshiligi áli kúnge deıin bastapqyda qajetti qarapaıym dúnıelerdiń jetispeýshiliginen zardap shegýde. Sý, elektr qýaty, azyq-túlik joq. Bizdiń elimizde kómek der kezinde kórsetildi, al eldi mekender qalpyna keltirilip qana qoımaı, jańa ajarǵa ıe boldy. Bul halyq birliginiń jarqyn mysaly»,- dedi Prezıdent.
