Assambleıa medıatorlary 10 myńǵa jýyq aryz-shaǵymdy qarady

ASTANA. QazAqparat – Qazaqstan halqy Assambleıasy janynan tarıhta alǵash ret etnomedıatorlar ınstıtýty quryldy. Bul týraly QR Prezıdenti Ákimshiligi basshysynyń orynbasary Aıda Balaeva aıtty, dep habarlaıdy QazAqparat tilshisi.

«Assambleıa óz deńgeıinde azamattardyń quqyqtaryn qorǵaýǵa qatysady, dálirek aıtqanda medıatsııalyq protsesterge belsendi qatysady. Ótken jyldy alyp qarasaq, 10 myńǵa jýyq ótinish qaraldy, onyń 70%-y quqyqtyq konsýltatsııa kezeńinde sheshildi, barlyǵy boıynsha medıatıvti kelisimder jasaldy», - dedi Aıda Balaeva Qazaqstan halqy Assambleıasynyń XXXII sessııasynyń jalpy otyrysynda.

Onyń aıtýynsha, tarıhta alǵash ret etnomedıatorlar ınstıtýty quryldy. Óńirlerde 22 trenıng uıymdastyrylyp, onda 800 adam oqýdan ótti.

«2022 jyly etnosaralyq salada 20 zertteý júrgizildi, óńirlerde kóshpeli monıtorıngtik toptar jumys júrgizdi. El Prezıdenti Qasym-Jomart Toqaev osy reformalardyń barlyǵyn jaı ǵana reformalar úshin emes, óz halqymyz úshin, ishki rýhanı-adamgershilik jáne mádenı áleýeti joǵary, bilimdi, básekege qabiletti tulǵany qalyptastyrý úshin jasap jatqanymyzǵa basa mán beredi», - dedi A. Balaeva.

Buǵan deıin Prezıdent Ákimshiligi basshysynyń orynbasary 2023-2024 jyldary 1300 aýyldyń ákimi saılanatynyn aıtqan edi.