Assambleıa «Qazaqstannyń 100 jańa esimine» engen tulǵalardy nasıhattamaq - Darhan Myńbaı
«Qazaqstannyń 100 jańa esimi» jobasy jer-jerde talqylanyp jatyr. Bunyń ózi qoǵamdyq ómirge bir serpin ákeldi desek te bolady. Aıtylǵan 302 kandıdatqa daýys beretin bolamyz. Bul óte jaýapty da mańyzdy jumys. Óıtkeni, bul joba boıynsha biz shyn máninde laıyqtylardy tańdap alýymyz kerek. Assambleıanyń barlyq qurylymdary, etnomádenı birlestikter jumysqa belsene atsalysty. Assambleıanyń tarapynan 893 adamnyń jetistigi men ómiri týraly málimet portalǵa (el.kz portalyna - avt.) engizildi», - deıdi QHA Tóraǵasynyń orynbasary.
Darhan Myńbaı óz sózinde Elbasy aıtqandaı, ulttyń altyn qoryn qalyptastyryp jatqan adamdardy tańdap alýdyń mańyzdylyǵyn erekshe atap ótti.
«Assambleıa músheleri osy tarapta jumys atqaryp jatqan komıssııa quramynda boldy. Búgingi tańda qoǵamdyq daýys berý arqyly jobanyń aıaqtalý kezeńine taıap qaldyq. Barlyq azamattardy daýys berýge shaqyramyn. 100 jańa esim Qazaqstanda birinshi ret ótkizilip otyr. Onyń quramyna enýdiń ózi, menińshe, zor syı-sııapat. Ol tizimge engen adamǵa degen qurmet bunymen toqtap qalmasy anyq», - deıdi ol.
Sonymen birge, Darhan Myńbaı 2018-2019 jyly QHA 11 joba, atap aıtqanda, «Jastardyń altyn besigi», «Meniń jáne meniń elimniń jetistikteriniń tarıhy», «Ózińdi óziń shyńda», «Kóshbasshy bol», taǵy sol sekildi jobalardy qolǵa alyp jatqanyn jetkizdi. Bunyń barlyǵy «Qazaqstannyń 100 jańa esimine» engen adamdardyń eńbegin nasıhattap, dáripteýge septigin tıgizbek.
«Adamdardyń ózinen emes, olardyń eńbeginen úlgi alý kerek degen oıdamyn. Árbir azamat Qazaqstannyń 100 jańa esimine engen adamdardan ózindik úlgi alar degen oıdamyn. Sózsiz, bul joba óziniń jalǵasyn tabýy kerek. Óıtkeni, biz ózimizdiń zamanymyzdyń úlgili ári ozyq adamdaryn halyqqa kórsete bilýimiz kerek», - dep túıdi Darhan Myńbaı.
Eske sala ketsek, 100esim.el.kz saıtynda «Qazaqstannyń 100 jańa esimin» anyqtaý boıynsha 18 qazanda onlaın daýys berý bastalady. Daýys berý 10 qarashada aıaqtalmaq.
