«Assambleıa qazaq tilin bir-aq aıda úıretpek» - respýblıkalyq basylymdarǵa sholý
***
Qazaqstan Respýblıkasy Parlamentiniń Reglamentine sáıkes, depýtattar saıası partııalardyń fraktsııalary túrinde depýtattyq birlestikter qurýǵa quqyly. Osyǵan oraı «Nur Otan» halyqtyq-demokratııalyq partııasynan, Qazaqstannyń «Aq jol» demokratııalyq partııasynan, Qazaqstannyń Kommýnıstik halyq partııasynan V shaqyrylǵan Parlamentke saılanǵan Májilis depýtattary palata bıýrosyna óz fraktsııalaryn Májiliste tirkeý jóninde ótinish jasady. Bul ótinishterdi bıýro músheleri biraýyzdan qoldady. Úsh fraktsııanyń jetekshileri de Májilis bıýrosynyń quramyna endi. Bul týraly «Egemen Qazaqstan» basylymynyń búgingi sanyndaǵy «Partııalardyń fraktsııalary tirkeldi» atty maqaladan qarańyz.
Atalmysh basylymnyń jazýynsha, qaryshty Qazaqstan Jańa jyldy aıryqsha oqıǵalarmen bastap otyr. Kúni keshe ótken saılaý demokratııalyq ustyndarymyzdy nyqtap, kóppartııalyq Parlamentti qalyptastyrdy. Astanalyq Aqmola oblysy osynaý jarqyn ózgeristerdiń alǵy sapynan kóriný jaýapkershiligin atqarýǵa nyq negizder qalaý ústinde. Ol oblys basshylyǵyndaǵy uıymdyq turǵydaǵy ózgeristerden de serpin alatyny belgili. Bul ózgerister jóninde «Jańarý zamanynyń jaýapkershiligi júkteldi» atty maqaladan qarańyz.
***
Jasyratyny joq, bárimiz ǵalamtormen dospyz. Tań atqannan kesh batqanǵa deıin aldymyzdaǵy monıtordan kóz almaımyz. Qazir saıttyń, áleýmettik jelilerdiń túr-túri bar. Ushy-qıyrsyz ǵalamtor áleminen tappaıtynyńyz joq. M-agent, onlaındaǵy áńgime kúndelikti ómirimizdiń bir bólshegine aınalǵandaı... Áıtse de álemdik zertteýshiler ǵalamtorǵa táýeldilik adamdy kúızeliske ushyratady dep paıymdaıdy. Nelikten? Bul saýaldyń jaýabyn «Aıqyn» basylymynyń búgingi sanyndaǵy «Ǵalamtor kúızeliske ushyratady» atty maqaladan bilýge bolady.
Sondaı-aq osy basylymnyń jazýynsha, elimizdiń salyq júıesi birqatar mańyzdy qaıta qurýlardan ótti. Degenmen osy qaıta qurýlar úlken oń ózgerister alyp kelgenin ańǵarýǵa bolady. Oǵan dálel elimizdiń salyq júıesiniń halyqaralyq deńgeıge jetkendigi. Dúnıejúzilik bank Doing Business reıtınginiń baǵalaýy boıynsha, byltyr jyl sońynda burnaǵy jylmen salystyrǵanda 14 orynǵa kóterilip, 39-shy orynǵa taban tiredik. Bul - TMD aýmaǵyndaǵy eń joǵary kórsetkish. Bul týraly «Aıqyn» basylymynyń búgingi sanyndaǵy «TMD-da eń joǵary kórsetkishke jettik» atty maqaladan egjeı-tegjeıli bilesizder.
***
«Alash aınasy» basylymynyń jazýynsha, Qazaqstan halqy Assambleıasy ózge ult ókilderine arnap qazaq tilin jedel úırenýdiń ádistemesin ázirledi. Keshe uıym janyndaǵy «Tildaryn» tilderdi oqytý tehnologııalarynyń ádistemelik ortalyǵy jańa ádistemeniń jobasyn dúıim jurtqa tanystyrdy. Álem halyqtarynyń 30 birdeı tilin biletin Reseıdiń psıholıngvıstıka ǵalymy Dmıtrıı Petrovtyń tájirıbesi negizinde jasalǵan jedel til úırený júıesi áli synalǵan joq. Onyń naqty nátıjesi bir aıdan keıin belgili bolmaq. Bul týraly «Alash aınasy» basylymynyń búgingi sanyndaǵy «Assambleıa qazaq tilin bir-aq aıda úıretpek» atty maqalada.
Osy basylym elimizdiń Ulý jylyn úlken saıası ózgeristermen bastaǵandyǵyn jazady. Parlament saılaýy nátıjesinde jańa Májilis jasaqtalyp, Úkimet ishinara ózgerdi. Besinshi márte ótkizilgen Parlament saılaýynda halyq bir emes, birneshe partııany qoldady. Sonymen bul Májilistiń burynǵylarynan qandaı aıyrmashylyǵy bar?. Bul týraly «Alash aınasy» basylymynyń búgingi sanyndaǵy «Besinshi Májilistiń beınesi qandaı?» atty maqaladan bilýge bolady.
***
Qazaqstan Respýblıkasy Prezıdentiniń Jarlyǵymen Qazaqstannyń memleket bolyp qalyptasý tarıhyn júıeli túrde zertteý jáne nasıhattaý maqsatynda «Qazaqstan Respýblıkasy Prezıdentiniń Mádenıet ortalyǵy» memlekettik mekemesinen jáne osy ýaqytta saılanyp jatqan «Ult kóshbasshysy, Qazaqstan Respýblıkasy Tuńǵysh Prezıdentiniń kitaphanasynan» kópsalaly ǵylymı-saraptamalyq, gýmanıtarlyq-aǵartý «Nazarbaev-ortalyǵy» memlekettik mekemesi ashyldy. Atalmysh mekeme men onyń maqsat-mindetteri jáne negizgi qyzmeti týraly «Kazahstanskaıa pravda» basylymynyń búgingi sanyndaǵy «Sozdaetsıa - Nazarbaev tsentr» atty maqaladan oqı alasyzdar.
