Assambleıa birlik pen teńdiktiń, turaqtylyq pen tynyshtyqtyń sımvolyna aınaldy — Prezıdent
ASTANA. KAZINFORM — Assambleıa birlik pen teńdiktiń, turaqtylyq pen tynyshtyqtyń sımvolyna aınaldy. Bul týraly Qazaqstan halqy Assambleıasynyń HHHІV sessııasynda Memleket basshysy Qasym-Jomart Toqaev aıtty.
— Búgingi basqosýdyń tarıhı mán-mańyzy aıryqsha. Bıyl Qazaqstan halqy Assambleıasynyń qurylǵanyna 30 jyl tolyp otyr. Barshańyzǵa qutty bolsyn! Bul — búkil Qazaqstan úshin aıtýly oqıǵa. Osy ýaqyt ishinde Assambleıa qoǵamdaǵy turaqtylyq pen kelisimdi nyǵaıtýǵa ólsheýsiz úles qosty. Elimizdegi birlik pen teńdiktiń, turaqtylyq pen tynyshtyqtyń sımvolyna aınaldy. Etnosaralyq qatynas salasyndaǵy teńdessiz qoǵamdyq ınstıtýt retinde tanyldy. Sonyń arqasynda Qazaqstanda beıbitshilik pen kelisimniń qaıtalanbas úlgisi qalyptasty. Assambleıa tarıhy elimizdiń egemendik jylnamasymen tyǵyz astasyp jatyr. Uıym 1995 jyly Qazaqstannyń tuńǵysh Prezıdenti Nursultan Nazarbaevtyń bastamasymen qurylǵanyn bilesizder. Bul bastama qazaq memlekettiligi qalyptasyp jatqan qıyn kezeńde tereń saıası mánge ıe boldy, — dedi Memleket basshysy.
Prezıdent konsýltatıvtik-keńestik organ retinde jasaqtalǵan Assambleıaǵa 2007 jyly konstıtýtsııalyq mártebe berilip, uıym jalpyulttyq birliktiń negizgi modeline aınalǵanyn aıtty.
— Elimizde sońǵy jyldary atqarylǵan aýqymdy ózgeristerdiń arqasynda Assambleıa qyzmeti jasampazdyqtyń jańa sıpatyna kóterildi. Senattyń bes depýtatyn Assambleıa keńesiniń usynysymen Prezıdent taǵaıyndaıdy. Bul qadam zańnamalyq deńgeıde barlyq etnostyń múddesin qorǵaý múmkindigin edáýir arttyrdy. Oǵan qosa, Qazaqstan parlamentarızmi tarıhynda alǵash ret «Bir el — bir múdde» atty palataaralyq depýtattar toby quryldy. Bul top qoǵamdyq kelisimdi nyǵaıtý máselelerimen aınalysady. Qazir memlekettik organdar túgel Assambleıa jumysyna atsalysady. Mınıstrlikterden, oblys ákimdikteri men barlyq deńgeıdegi máslıhattardan bastap aýyl ákimdikterine deıin odan shet qalmaıdy, — dedi Qasym-Jomart Toqaev.
Osyǵan deıin Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy bastalǵanyn jazdyq.