Aspannan jerge túsý kerek – Rafael Ýrazbahtın «Qaırattyń» jeńilisine qatysty málimdeme jasady
ASTANA. KAZINFORM – Almatylyq «Qaırattyń» bas bapkeri Rafael Ýrazbahtın ótken matchtyń qorytyndysy boıynsha jeńilisine qatysty málimdeme jasady.
Bapkerdiń aıtýynsha, almatylyq ujym kezdesýdiń bastapqy jáne sońǵy mınýttarynda jınaqylyq tanyta almaǵan. Ýrazbahtın oıynshylardyń ótken maýsymdaǵy tabystarǵa mastanyp, bosańsyp ketkenin ashyq jetkizdi.
– Shynymdy aıtsam, dál osy syndy men qazir kıim aýystyrý bólmesinde jigitterge de aıttym. Biz oıynnyń alǵashqy 10 mınýty men sońǵy 10 mınýtyn sátsiz ótkizdik. Tipti, alǵashqy mınýttarda komanda stadıonǵa múldem kelmegendeı áser qaldy. Bul nemen baılanysty ekenin bilmeımin – bálkim áli de Chempıondar lıgasynyń ekinshi kezeńine shyqqanymyzdy toılap júrgen shyǵarmyz. Biraq men jigitterge bulaı jalǵasa bermeıtinin eskerttim. Ótken jylǵy jetistiktiń bárin umytý kerek, – dedi bas bapker.
Bapkerdiń aıtýynsha, «Qaıratqa» qarsy kez kelgen ujym baryn salyp oınaıdy. Sondyqtan komandaǵa bárin basynan bastaý kerek ekenin túsindirgen.
– Bizge biraz jerge túsý kerek. Jigitterge de sony aıttym, bárin nólden bastaý qajet. Bıyl bizge qarsy kez kelgen komanda, qaı lıgada bolsa da, azýyn basyp keledi. Oıynnyń ortasynda tizgindi qolǵa alyp, múmkindikter jasaǵanymyzben, gol soǵa almadyq. Esep 2:1 bolyp turyp aldy. Bul bizge úlken sabaq bolady dep oılaımyn, – dep túıindedi R. Ýrazbahtın.
Aıta keteıik, búgin «Tobyl» komandasy fýtboldan Qazaqstan sýperkýbogynyń ıegeri atandy.
