Aspan asty elinde aýqymdy forým ótti
ASTANA. QazAqparat - Jýyrda Elbasy Nursultan Nazarbaev Qytaıda ótken alqaly jıynǵa qatysty. Sharaǵa otyzǵa jýyq memleketterdiń basshylary keldi.
Forýmdy ashqan Qytaı Halyq Respýblıkasynyń Tóraǵasy Sı Tszınpın 2013 jyly kúzde Qazaqstanda, odan keıin Indonezııada Jibek jolynyń ekonomıkalyq beldeýi men HHІ ǵasyrdyń teńizdegi Jibek jolyn, «Bir beldeý, bir jol» jobasyn birigip iske asyrýǵa bastama jasaǵanyn aıtty. «Sodan bergi tórt jyl ishinde júzden astam memleket pen halyqaralyq uıymdar bul jobanyń qurylysyna belsendi túrde qosylyp otyr» dedi ol.
Mártebeli jıynnyń basty maqsaty Jibek joly boıyndaǵy ornalasqan elderdiń arasyndaǵy kópsalaly yntymaqtastyqty jandandyrý baǵyttaryn talqylaý, ózara is-qımyl joldaryn qalyptastyrý, óńirlik yqpaldastyq nátıjeleri boıynsha tájirıbe almasý boldy. Saýda-ekonomıkalyq yntymaqtastyq, ónerkásiptik ınvestıtsııalar, ınfraqurylymdyq jobalar, energetıka men tabıǵı resýrstar, qarjylyq qoldaý, qorshaǵan ortany qorǵaý sııaqty mańyzdy máseleler talqylandy.
Yntymaqtastyq forýmnyń saltanatty ashylý rásimi aıasynda Elbasy Qytaı Tóraǵasy Sı Tszınpındi forýmnyń tabysty ashylýymen quttyqtap, sáttilik tiledi. Sı Tszınpınge «Bir beldeý, bir jol» forýmyna shaqyrǵany úshin alǵys aıtyp, is-sharanyń jaqsy uıymdastyrylǵanyn, Qazaqstan men Qytaıdyń qarym-qatynastary ózara tıimdi yntymaqtastyqqa negizdelgenin atap ótti.
- «Bir beldeý, bir jol» - jańa paradıgma, jańa deńgeıdegi yntymaqtastyq júıesi. Bul beldeý jer shary turǵyndarynyń 45%-yn quraıtyn 60-tan astam eldi qamtyp otyr. Qazaqstan men Qytaı Halyq Respýblıkasy arasyndaǵy ekijaqty jáne kópjaqty yntymaqtastyq úlgi alarlyqtaı boldy. Basqa elder bizden úırene alady, - dedi Prezıdent.
Óz kezeginde Sı Tszınpın elimizdiń kontınentaralyq tranzıttik áleýetin joǵary baǵalady. Ol «Nurly jol» baǵdarlamasynyń tabystylyǵyn, sondaı-aq Azııadaǵy ózara is-qımyl jáne senim sharalary keńesiniń halyqaralyq bastamasynyń mańyzdylyǵyna toqtaldy. Qazaqstanǵa resmı saparmen keletinin, Shanhaı yntymaqtastyq uıymynyń sammıtine jáne EHRO-2017 halyqaralyq mamandandyrylǵan kórmesiniń ashylýyna qatysýǵa daıyn ekenin aıtty. Sırııa qaqtyǵysyn retteý protsesine qosqan úlesi úshin Nursultan Nazarbaevqa alǵysyn bildirdi.
Forým aıasynda Elbasy «Tyǵyz yntymaqtastyqqa arnalǵan saıası birlesken qyzmet» atty dóńgelek ústelde sóz sóıledi. Munda áriptes elder arasyndaǵy yntymaqtastyqtyń mańyzdy máselelerine nazar aýdardy. Sı Tszınpınniń Eýrazııada ejelgi Jibek jolyn jańa, zamanaýı formatta qaıta jandandyrý ıdeıasy álemde beleń alyp kele jatqan saıası, ekonomıkalyq jáne gýmanıtarlyq daǵdarystarǵa berilgen ýaqtyly jaýap ekenin atap ótti.
«Birlese damý arqyly turaqtylyqqa qol jetkizý» ustanymy búginde ondaǵan eldiń ekonomıkalyq múddesine saı keletin halyqaralyq yntymaqtastyqtyń tartymdy formasy bolyp sanalatynyn tilge tıek etti. «Úlken Eýrazııanyń» birtutas ekonomıkalyq keńistigin qurý ıdeıasy jańa mánge ıe bolyp otyrǵanyn aıryqsha atady. Sondaı-aq Nursultan Nazarbaev ınnovatsııalyq jáne ǵylymı-tehnıkalyq damý salasyndaǵy yntymaqtastyqty tereńdetýdi usyndy.
Sonymen qatar Elbasy Belarýs Prezıdenti A.Lýkashenkomen jáne Ózbekstan Prezıdenti Sh.Mırzıeevpen, Pákistannyń jáne Malaızııanyń
Premer-Mınıstrleri N.Sharıfpen jáne N.Razakpen, Dúnıejúzilik ekonomıkalyq forýmnyń tóraǵasy K.Shvabpen júzdesti. Sonymen qatar, Nursultan Nazarbaev BUU Bas hatshysy A.Gýterrıshpen áńgimelesti. Áńgime barysynda ol Shanhaı yntymaqtastyq uıymynyń Astanada ótetin sammıtine qatysý nıeti bar ekenin rastady. Sondaı-aq Ispanııa Premer-mınıstri M.Rahoı Qazaqstan Prezıdentimen áńgimelesý kezinde EKSPO-2017 halyqaralyq kórmesine Ispanııa Koroliniń qatysatynyn rastady.
