«Aspaly kópir taǵdyry aspanda ilýli tur» - respýblıkalyq basylymdarǵa sholý

***

Qazaqstan Repýblıkasynyń Prezıdenti Nursultan Nazarbaevtyń Koreıa Respýblıkasyna sapary aıryqsha tabysty bolyp, eki eldiń barlyq saladaǵy baılanystarynda jańa kezeńdi bastap berdi», dep jazady «Egemen Qazaqstan» gazeti «Tańǵy shyq elinde» degen taqyryppen jarııalanǵan maqalasynda. Basylymnyń jazýynsha, keshe tústen keıin Nursultan Nazarbaev Koreıa Prezıdentiniń «Chongvade» rezıdentsııasynda el basshysy Lı Men Bakpen az adamdyq aıada kezdesti. Kelissózder kezinde ekijaqty qarym-qatynastardyń quqyqtyq negizi Qazaqstan Prezıdenti Nursultan Nazarbaevtyń Koreıa Respýblıkasyna 1995 jylǵy mamyr aıyndaǵy memlekettik sapary barysynda qol qoıylǵan Ózara qarym-qatynastar men yntymaqtastyqtyń negizgi qaǵıdattary týraly deklaratsııa bolǵany razylyqpen atap ótildi. Kelissózder barysynda eki jaqty yntymaqtastyq máseleleriniń keń kólemdi aýqymy talqylanyp, eki el arasyndaǵy strategııalyq áriptestikti bekite túsýge baǵyttalǵan sharalar anyqtaldy.

«Eki eldiń saýda-ekonomıkalyq yntymaqtastyǵynyń damýy jedel qarqyn alyp otyr. Qazirgi kezde Qazaqstanda koreılik kapıtaldyń qatysýymen 300 birlesken kásiporyn jumys isteıdi. Ońtústik Koreıanyń Qazaqstan ekonomıkasyna salǵan tikeleı ınvestıtsııasynyń jalpy kólemi 3,4 mıllıard dollardy quraıdy», dep naqtylaı túsedi basylym.

Memleket basshysynyń Koreıa Respýblıkasyndaǵy resmı sapary jaıynda egjeı-tegjeıli jazylǵan maqalalar toptamasyn «Kazahstanskaıa pravda», «Lıter», «Ekspress-K», «Aıqyn» gazetterinen de oqı alasyzdar.

«Egemen Qazaqstan» gazetiniń QR Premer-Mınıstriniń baspasóz qyzmetin silteme jasap habarlaýynsha, keshe Úkimet basshysy Kárim Másimov Bilim jáne ǵylym mınıstrligi Ǵylym komıtetiniń «Qazaqstan Respýblıkasynyń ulttyq bıotehnologııalar ortalyǵy» RMK-de boldy. Onda Premer-Mınıstr mıkroorganızmderdiń respýblıkalyq kollektsııasyn qarap, bıotehnologııalar jáne ósimdikter selektsııasy, ımmýnohımııa jáne ımmýnobıotehnologııa zerthanalarynyń, sondaı-aq ulttyq tıotehologııalar ortalyǵy ujymynyń sońǵy bes jyldaǵy negizgi ǵylymı jetistikteri qoıylǵan Ujymdyq paıdalanymdaǵy bıotehnologııalardyń ulttyq ǵylymı zerthanasynyń jumysymen tanysty.

Osy jaıtqa toqtalǵan «Kazahstanskaıa pravda» gazeti Úkimet basshysynyń «Eń basty másele - nátıje. Nátıjeni tutynýshynyń túpki múddesimen baılanystyratyn bolyńdar. Bul jerde ınnovatsııalar da, jańa tehnologııalar da, qazaqstandyq qamtý da, ǵylymdy damytý da, bári de bir arnada toǵysady. Endi alǵa qaraı qozǵalý qajet» degen sózin bergen.

«Bilim jáne ǵylym mınıstri Janseıit Túımebaev elimizge arnaıy saparmen kelgen Brıtanııa úkimetiniń halyqaralyq saýda jáne ınvestıtsııa jónindegi arnaıy ókili Iork gertsogy hanzada Endrıý Albert Krıstıan Edvard Vındzorskıımen kezdesti», dep jazady «Egemen Qazaqstan» gazeti. Mártebeli meıman osy júzdesý aldynda bıyl alǵashqy talapkerlerdi qabyldaıtyn Astananyń jańa ýnıversıtetinde bolyp, oqý ornynyń daıyndyǵyn, zaman talabyna qaraı jabdyqtalyp jatqan kabınetterdi aralap kórip, bul ýnıversıtettiń álemdegi tańdaýly joǵary oqý oryndary sanatynda bolatynyna senim bildirgen. Al kezdesý barysynda mınıstr Iork gertsogyna elimizdiń bilim berý júıesindegi irgeli ózgeristeri men qol jetken jetistikteri týraly aıta kelip, munyń bári Elbasy Nursultan Nazarbaevtyń aıryqsha mán berýiniń arqasynda júzege asyp jatqanyn jetkizgen.

***

«Sońǵy kezde keıbir ınternet-saıttar «Strasbýrgtegi halyqaralyq sot BTA bank qarjysyn urlaýǵa qatysty qylmystyq is boıynsha ótetin Muhtar Áblıazovti jáne osy iske qatysty taǵy alty adamdy Qazaqstanǵa ekstradıtsııalaý týraly sheshim shyǵarýdan bas tartty» degen aqparat taratty. Qazaqstan Respýblıkasynyń Bas prokýratýrasy bul aqparatty resmı túrde joqqa shyǵardy», dep jazady «Aıqyn» gazeti. Bas prokýratýranyń málimdeýinshe, Strasbýrgtegi adam quqyqtary boıynsha Eýropalyq sotta M.Ábilıazovti ekstradıtsııalaýǵa qatysty eshqandaı is qaralmaǵan.

«Aıqyn» gazetiniń dástúrli «Aq sóıle!» aıdarynyń búgingi qonaǵy - Qazaqstan Respýblıkasynyń Reseı Federatsııasyndaǵy Tótenshe jáne Ókiletti Elshisi Zaýytbek Turysbekov. Qazaqstan men Reseı arasyndaǵy ekonomıkalyq, mádenı qarym-qatynastar, Kedendik odaq máseleleri jáne taǵy da basqa jaıttarǵa oraı qoıylǵan saýaldarǵa tuşymdy jaýap bergen Elshi suhbaty «Qazaqstan men Reseı áriptestiktiń de, odaqtastyqtyń da jarqyn úlgisin kórsetip otyr» degen taqyryppen berilgen.

«Shókeev shekarany shegelep qaıtty». Osy taqyryppen «Aıqyn» gazetiniń juma kúngi nómirinde jaryq kórgen maqalada Premer-Mınıstrdiń birinshi orynbasary Ó.Shókeevtiń Shymkentte «Nur Otan» HDP OQO fılıalynyń ǵımaratynda Keden odaǵynyń erekshelikteri men artyqshylyqtaryn túsindirý máseleleri tóńireginde aımaqtyq, toptyq májilister ótkizgendigi, sondaı-aq ońtústik shekarany aralap, ony nyǵaıtý jumystarynyń qalaı júrip jatqandyǵyn kórip qaıtqan. Basylymnyń jazýynsha, elimizdiń ońtústik shekarasy 3,5 myń shaqyrymǵa sozylyp jatyr. Onyń 1 myń shaqyrymy tegis ýchaskelermen, 800 shaqyrymy taýly jerlermen, al qalǵany betpaq dala, jartylaı shóleıt aımaqtar arqyly ótedi eken. Qysqa ýaqyttyń ishinde osy aralyqta jumys istep turǵandarǵa qosymsha 25 shekara zastavasy salynbaq.

***

«Alash aınasy» gazetiniń birinshi betindegi «Aspaly kópir taǵdyry aspanda ilýli tur» degen taqyryppen berilgen maqalaǵa TMD-da teńdesi joq, biraq Semeıde bar aspaly kópirdiń búginderi tozyp bara jatqanyn, ony jóndeıtin mekeme men mamandardyń joqtyǵy jaıyndaǵy jan aýyrtarlyq máselesimen tanysa alasyzdar. Materıalda toǵyz joldyń torabynda, Eýropa men Azııany jalǵastyryp turǵan kópirge strategııalyq nysan mártebesin berý, oǵan repýblıkalyq bıýdjetten qarjy bólý, «Jol kartasy» baǵdarlamasyna engizý týraly usynys aıtylady.

Osy basylymda jaryq kórgen «Qazaq tiliniń qarjysy qaltaǵa ketip jatyr» degen maqalada Taraz qalasynyń tilshisi Gúljan Kósherova taıaýda Taraz qalasynda ashylǵan memlekettik tildi tegin oqytatyn ortalyq basshylyǵyndaǵylardyń arsyz áreketine, memleketten bólingen aqshany talan-tarajǵa salǵan qylmystyq isi jaıyna egjeı-tegjeıli toqtalǵan.

«Alash aınasy» gazetiniń dástrli «Oı-kókpar» aıdary «Qytaıdaǵy qandastarymyzdy assımılıatsııadan arashalaý úshin kóshi-qonnyń arnaıy jedel baǵdarlamasyn jasaý kerek pe?» degen taqyrypqa arnalǵan. Osy máseleni Parlament qabyrǵasynda kótergen depýtat Qurmanǵalı Ýálıge Dúnıejúzi qazaqtary qaýymdastyǵy tóraǵasynyń orynbasary Sultanáli Balǵabaev qarsy ýáj aıtady. Onyń pikirinshe, qazaqshylyq joıylyp bara jatyr dep baıbalam salý jalǵan emotsııa. Bul arada másele jańa baǵdarlama ashýǵa emes, keıbir mekemeler men sheneýnikterdiń qulyqsyzdyǵyna kelip tirelýde. Óıtkeni qalyptasqan dástúr boıynsha, ár memleket óziniń qandastaryn shaqyrtý úshin óz ókilderin jiberip, kóshi-qon máselesin syrttan uıymdastyrady. Al bizdiń sheneýnikter syrttan uıymdastyrýdy bylaı qoıǵanda, vıza bergisi kelmeıdi.