Aspaly jol men týrıstik soqpaq: Úlken Almaty kóliniń mańy qalaı ózgeredi
ALMATY. KAZINFORM — Úlken Almaty kóli mańynda týrıstik ınfraqurylymdy damytý jobalary qolǵa alyndy.
Qala ákimdiginiń málimetinshe, «Almaty — Kosmostantsııa» avtojoly, sondaı-aq «Alma-Arasan» shıpajaıyna aparatyn kireberis jol kúrdeli jóndeýden ótedi. Joba aıasynda uzyndyǵy 26,5 shaqyrym jol tolyq jańartylyp, avtoturaq salynady. Bul kólik qozǵalysynyń qaýipsizdigin arttyryp, atalǵan aýmaqtaǵy kólik júktemesin azaıtýǵa múmkindik bermek.
Sonymen qatar Úlken Almaty kóline aparatyn aspaly jol stantsııasynyń tujyrymdamasy ázirlengen.
— Joba ekologııalyq taza kólik túrin damytýǵa, shahardyń eń tanymal týrıstik oryndarynyń birine qoljetimdilikti arttyrýǵa jáne tabıǵı aýmaqqa túsetin antropogendik júktemeni azaıtýǵa baǵyttalǵan, — dep habarlady ákimdikten.
Úlken Almaty kóline aparatyn júrginshiler soqpaǵyn kórkeıtý jobasyna da erekshe nazar aýdarylyp otyr. Bul baǵytta qurylys-montaj jumystary bastalǵan. Jalpy joba aıasynda uzyndyǵy 5,3 shaqyrym bolatyn zamanaýı týrıstik soqpaq salynady. Onda kelýshilerdiń qaýipsiz ári jaıly qozǵalysy úshin qajetti ınfraqurylym qarastyrylady.
Marshrýt boıyna baǵyttaýshy belgiler men aqparattyq stendter ornatylyp, demalys oryndary, sholý alańdary, fotoaımaq, kúrdeli ýchaskelerde baspaldaqtar men ótkelder, sondaı-aq shaǵyn sáýlettik nysandar ornatylady.
Eske salaıyq, Almatydan kólge baratyn jol 2020 jyldan beri jeke kólikter úshin jabyq deýge bolady. Tek 2023 jyly «Almaty–Kosmostantsııa» avtojolynyń 8-34 shaqyrym aralyǵy 1 aıǵa jýyq ashylyp, sol jyldyń qyrkúıeginde qaıta jabyldy.
2025 jyldyń aqpan aıynda «Almaty-Kosmostantsııa» avtojoly (8-34 km) «QazAvtoJol» qaramaǵynan Almaty ákimdiginiń ıeligine berildi.
Bıyl Úlken Almaty kóline deıin jaıaý júrginshiler joly salynatyny belgili boldy.
