ASP Arena: Qonaevta bir mezette 3 200 adamdy qabyldaıtyn iri muz kesheni ashyldy

ASTANA. KAZINFORM — Qonaev qalasynda qysqy sport pen demalysty úılestirgen zamanaýı ASP Arena kesheni paıdalanýǵa berildi, dep habarlaıdy Týrızm ındýstrııasy komıtetiniń baspasóz qyzmeti.

Komıtet atap ótkendeı, bul — elimizde balamasy joq kópfýnktsıonaldy nysan. Keshen Ortalyq Azııadaǵy eń iri muz arenasyn sporttyq, oıyn-saýyq jáne kórermenderge arnalǵan ınfraqurylymmen biriktirip, Qazaqstan turǵyndary men qonaqtary úshin jańa tartymdy ortalyqqa aınalyp otyr.

— ASP Arena muz arenasynyń aýdany 20 600 sharshy metrdi quraıdy, ıaǵnı, munda halyqaralyq deńgeıdegi sport jarystaryn, jappaı syrǵanaý seanstaryn jáne aýqymdy shoý-baǵdarlamalardy ótkizýge bolady. Keshenniń jalpy aýmaǵy 63 gektar. Munda qonaq úı kesheni, kórermenderge arnalǵan aımaqtar, meıramhanalar, kartıng trassasy jáne túrli demalys nysandary ornalasqan. Sport kesheni bir mezette 3 200 adamdy qabyldaı alady, — delingen habarlamada.

ASP Arena-da jappaı syrǵanaýǵa erekshe basymdyq berilgen. Keshen kelýshiler úshin: jumys kúnderi (dúısenbi-juma) 10:00–den 23:00–ge deıin (úsh seans); demalys jáne mereke kúnderi 09:00–den 00:00–ge deıin (tórt seans) jumys isteıdi. Sport saraıy aýmaǵynda konkı jalǵa berý qyzmeti qarastyrylǵan. Jappaı syrǵanaý kez kelgen jastaǵy jáne daıyndyq deńgeıi ártúrli kelýshilerge qoljetimdi.

Vedomstvo málimetinshe, ASP Arena jobasynyń Qonaev qalasynda júzege asyrylýy Qazaqstandaǵy sport ınfraqurylymyn damytýǵa, oqıǵalyq týrızm men oıyn-saýyq ındýstrııasyn ilgeriletýge oń áser etip, eldiń iri halyqaralyq is-sharalar ótkizetin alań retindegi áleýetin arttyrady.

Budan buryn Astanada Esil jaǵalaýyndaǵy muz aıdyny ýaqytsha jabylǵanyn jazǵanbyz.