Aslanbek Jaqypovtyń isi: Departament basshysyn qandaı jaza kútip tur

NUR-SULTAN. QazAqparat - Nur-Sultan qalasynyń Esil aýdandyq sotynda QR Ulttyq ekonomıka mınıstrligi kásipkerlikti damytý departamentiniń dırektory Aslanbek Jaqypovtyń isine qatysty sot otyrysy bastaldy, dep habarlaıdy QazAqparat tilshisi.

Aslanbek Jaqypov QR Qylmystyq kodeksiniń 190-baby 3-bóligi boıynsha («Alaıaqtyq, ıaǵnı bótenniń múlkin jymqyrý nemese aldaý nemese senimdi teris paıdalaný jolymen bóten múlikke quqyqty ıemdený») jaýapqa tartylyp otyr.

Sot otyrysy barysynda Aslanbek Jaqypov bilimi men otbasylyq jaǵdaıyna qatysty suraqtarǵa jaýap berdi.

«Eki joǵary bilimim bar: zańgerlik jáne ekonomıkalyq. Saıasattanýdan magıstrlik dárejem bar jáne iskerlik ákimshilik doktorymyn. Jumys ornym - QR Ulttyq ekonomıka mınıstrliginiń kásipkerlikti damytý departamenti», - dedi sheneýnik.

Sonymen qatar, Jaqypov osy jazda úılenýdi josparlaǵanyn atap ótti.

Óz kezeginde sot Qanat Tobaǵalıuly qylmystyq is memlekettik aıyptaýshy Murat Edildiń qatyýsymen ótetinin habardarlady.

Sýdıa sonymen qatar, aıyptalýshynyń sot otyrysyn 29 mamyrǵa aýystyrý týraly ótinishin qanaǵattandyrdy.

Habarlanyp otyrǵandaı, aıyptalýshynyń kinási dáleldengen jaǵdaıda úsh jyldan jeti jylǵa deıin bas bostandyǵy shekteledi nemese dál sol merzimge bas bostandyǵynan aıyrylýy múmkin. 2-bólik boıynsha qylmysy dáleldense, urlaǵan múlkiniń baǵasyn jıyrma eselep qaıtarý nemese múlkiniń tárkilenýimen memlekettik qyzmette ómir boıy eńbek etý quqyǵynan aıyrylýymen úsh jyldan jeti jylǵa deıin bas bostandyǵynan aıyrý jazasy taǵaıyndalýy yqtımal.

Eske sala ketsek, Ulttyq ekonomıka mınıstrligi Kásipkerlikti damytý departamentiniń basshysy Aslanbek Jaqypovqa qatysty is prokýratýraǵa joldanǵanyn buǵan deıin habarlaǵan bolatynbyz.