Aslan, Álıhan jáne Álınur: Túrkistan oblysynda úshem ómirge keldi
TÚRKІSTAN. KAZINFORM — № 1 oblystyq perınataldyq ortalyqta Shardara aýdanynyń turǵyny, 43 jastaǵy Orynkúl Nurabaeva úshem dúnıege ákelip, 11 balanyń anasy atandy.
Uldardyń salmaǵy — 2265 gramm, 2455 gramm, 2405 gramm. Úshemder mezgilinen erte týylǵandyqtan, dárigerlerdiń qatań baqylaýyna alynǵan. Qazirgi tańda ana men nárestelerdiń jaǵdaıy jaqsy. Búgin sábıler men anasy perzenthanadan úılerine shyǵaryldy.
Jalpy óńirde bıylǵy jyldyń 6 aıynda 22 638 bala dúnıege kelgen. Oblysta 22 perzenthana qyzmet kórsetedi. Bosandyrý uıymdarynda 319 akýsher-gınekolog, 89 neonatolog, 101 anestezıolog-reanımatolog jumys isteıdi. 165 akýsher-gınekolog ota jasaý daǵdylaryn meńgergen.
Aıta keteıik, 2025 jyldyń basynan beri № 1 oblystyq perınataldyq ortalyǵynda 4050 náreste dúnıege kelgen. Onyń ishinde, 72-si — egizder. Bul kórsetkish ótken jylmen salystyrǵanda 271 balaǵa kóp.
Aıta keteıik, budan buryn Shymkentte Merıem, Rasýl, Gamzat esimdi úshem dúnıege kelgen bolatyn.