Áskerler tártibin esepke alý júıesi jańartylady
ASTANA. KAZINFORM – Bas prokýratýranyń Quqyqtyq statıstıka jáne arnaıy esepke alý jónindegi komıteti qylmystyq emes sıpattaǵy barlyq áskerı oqıǵalardy ortalyqtandyrylǵan esepke alý platformasyn engizý jumystaryn júrgizýdi qolǵa aldy.
Atalǵan komıtettiń Áskerı departamenti esepke alý platformasyn Bas áskerı prokýratýrasy, Qorǵanys mınıstrligi, Memlekettik kúzet qyzmeti, UQK Shekara qyzmeti jáne Ulttyq ulanmen birlesip júzege asyrmaqshy.
«Bul qadamǵa ár vedomstvanyń mundaı derekterdi óz betinshe jınaqtaýy negiz boldy. Keıbir oqıǵalar quqyqtyq esepte bolmaǵan, sondaı-aq tıisti aqparatty taldaý tártibiniń biryńǵaı tásili de bolǵan joq» — dep habarlady Bas prokýratýranyń baspasóz qyzmeti.
Osyǵan baılanysty, «Áskerı ahýaldyq-taldaý ortalyǵy» jobasy ázirlendi. Onda qylmystyq quqyq buzýshylyq belgileri joq áskerler men áskerı quramalardaǵy barlyq oqıǵalar týraly málimetter tsıfrlandyrylyp jınaqtaldy.
Quqyqtyq esepke alýǵa jatatyn 124 oqıǵa túri ázirlendi. Bul tizimge áskerı qyzmetshilerdiń jaraqat alýy, kúzet qyzmetin atqarý erejelerin, sondaı-aq jalpy áskerı jarǵylardyń basqa da talaptaryn buzý sııaqty oqıǵalar engizilgen.
Málim bolǵandaı, pılottyq rejımde 2023 jyly jáne 2024 jyldyń ótken kezeńinde 886 oqıǵa boıynsha derekter bazaǵa engizildi. Olardyń kóp bóligin ákimshilik quqyq buzýshylyqtar — 263, qyzmetke shyqpaý — 108, tártip pen kıim úlgisin buzý — 49 jáne basqa da quqyq buzýshylyqtar quraıdy.
«Bul málimetterdiń barlyǵy áskerler tártibiniń jaǵdaıy týraly aqparat retinde (qylmystylyqty qospaǵanda) avtomatty túrde qalyptastyrylady, ol áskerı qyzmetshiler arasyndaǵy oqys oqıǵalar men quqyq buzýshylyqtardyń aldyn alý sharalaryn ázirleý úshin qoldanylady jáne kún saıyn taldanady» - delingen habarlamada.
Búgingi tańda osy tsıfrlyq platformany júrgizý jónindegi Nusqaýlyq jobasy múddeli organdarmen kelisilip jatyr.
