«Áskerimizdiń áleýeti jaýyngerlik paradta tanylady» - BAQ-qa sholý
***
7 mamyrda ótkiziletin jaýyngerlik parad qarsańynda «Egemen Qazaqstan» gazeti Qazaqstan Respýblıkasy Qarýly Kúshteri Qurlyq áskerleriniń bas qolbasshysy, general-leıtenant Murat Maıkeevpen suhbattasqan. Áńgimelesý barysynda tilshi saýalyna egjeı-tegjeıli jaýap bergen ol: «Jyldan-jylǵa jaýyngerlik daıyndyqtyń qarqyny arta túsýde. Armııany tolyǵymen qaıta qarýlandyrý joǵary deńgeıde júrgizilýde. Qazaqstan Qarýly Kúshteri qarý-jaraqtyń jáne áskerı tehnıkanyń jańa úlgilerimen jabdyqtalýda. Qolda bar jaýyngerlik tehnıkalar qazirgi zamanǵy jaǵdaıda qoldanýǵa jetildirilip jatyr. Bir sózben aıtqanda, otandastarymyzǵa kórsetetin is-sharalar jeterlik. Jaýyngerlik parad Qarýly Kúshter úshin qazaqstandyqtardyń boıynda maqtanysh sezimin týdyryp, qoǵamda áskerı qyzmettiń jáne Otandy qorǵaýdyń túsindirý jumystaryn kóterýge kezekti qadam jasalatyndyǵyna, sondaı-aq ósip kele jatqan urpaqtyń patrıottyq sezimin qalyptastyrýǵa jańa serpin beretinine senimdimin», - deıdi. Suhbat «Áskerimizdiń áleýeti jaýyngerlik paradta tanylady» degen taqyryppen berilgen.
«2008 jyly bastalǵan qarjy-ekonomıkalyq daǵdarys búkil álemdi sharpyp, onyń sońy jahandyq retsessııaǵa ulasqany belgili. Túptep kelgende, bul joıqyn dúrbeleńge túrtki - AQSh-ta bastalǵan ıpotekalyq shıelenis. Onyń alǵashqy belgileri álgi elde 2006 jyldyń ózinde-aq syr bergen-di. Birte-birte onyń zardaby búkil álemge jaıylyp, úlkendi-kishili ekonomıkalardyń quldyraǵany sonshama, búgingi tańda álemdegi jumyssyzdardyń sany 200 mıllıonnan asyp jyǵylady», dep jazady senator Ádil Ahmetov «Egemen Qazaqstan» gazetiniń búgingi sanynda jarııalanǵan «Qundylyqtar quldyraýy áleýmettik turaqsyzdyqqa soqtyratyn syn-qater» atty maqalasynda. Jarııalanym avtorynyń paıymynsha, Elbasynyń bastamasymen Astanada joǵary deńgeıde ótkizilip júrgen ekonomıkalyq forýmdardyń mańyzy óte zor. Onyń ishinde, ásirese, besinshi forýmda Prezıdent Nazarbaev jarııa etken G-Global qaǵıdasynyń keleshegi úlken. Óıtkeni, aqparat quraldary sharyqtap damyǵan búgingi zamanda álemdik ekonomıka men qarjy salasyn tyǵyryqqa tirep otyrǵan jahandyq daǵdarystyń sebep-saldaryn tek oza damyǵan elderdiń basyn qosatyn G-8 nemese G-20 dep atalatyn klýbtarǵa múshe alpaýyt elderdiń tizginin ustaǵandar ǵana sheshe almaıtynyna adamzattyń kózi anyq jetti.
***
«Kazahstanskaıa pravda» gazetiniń búgingi sanynda basylǵan «Planırýetsıa otkrytıe dıpmıssıı» degen taqyryptaǵy maqalada taıaý aralyqta Argentınanyń Qazaqstandaǵy Dıplomatııalyq mıssııasy ashylýy múmkin ekendigi baıandalǵan. Bul másele, keshe QR Syrtqy ister mınıstri Erlan Ydyrysov pen Argentına Respýblıkasy Syrtqy ister mınıstriniń orynbasary Edýardo Sýaın kezdesýi barysynda talqyǵa túsken.
Sonymen qatar taraptar qazaqstandyq-argentınalyq saıası jáne ekonomıkalyq yntymaqtastyqty, energetıka jáne aýylsharýashylyq salalarynda ózara is-qımyldardy damytýdyń bolashaǵyn talqylaǵan.
CNN-ge silteme jasaǵan «Vremıa» gazeti Bostonda lańkestik áreketter jasaýǵa kúdiktiler AQSh-qa Qazaqstannan kelgen dep habarlaıdy. Bostondaǵy lańkestik áreketterge kúdikti aǵaıyndy Tsarnaevter, 19 jastaǵy Djohar men 26 jastaǵy Tamerlan AQSh-qa Qazaqstannan keldi, oǵan deıin olar Sheshenstanda boı tasalaǵan, deıdi telearna. Al Amerıkanyń taǵy bir telearnasy NBC olardyń AQSh-qa 2002 nemese 2003 jyldary óz otbasylarymen qonys aýdarǵandyǵyn aıtýda.
