Áskerılerge ótemaqy alyp beremin degen maıor 7 jylǵa sottaldy
Sot málimetine súıensek, maıor shenindegi áskerı Qaraǵandy oblysy Prıozersk qalasynda ornalasqan 44841 áskerı bóliminiń áskerı radıotehnıka tsıkliniń oqytýshysy - aǵa ofıtser laýazymynda qyzmetin atqaryp júrgen.
«Óziniń áskerı qyzmetin atqarý barysynda áskerı qyzmetker bola turyp, Prıozersk qalasynda quqyqqa qaıshy, qasaqana menshikke qarsy jáne sybaılas jemqorlyqqa qatysty aıtarlyqtaı mólsherde jáne birneshe ret aýyr qylmystardy kelesi jaǵdaılarda jasaǵan. 2015 jyly kúdiktelýshi Prıozersk garnızonynyń basqa da áskerı qyzmetkerleri barlyǵy 11 adam Balqash aýdandyq paıdalaný bólimine kelip, ótemaqy alý maqsatynda ózderiniń qajetti qujattaryn tapsyrǵan», - dep habarlady sot.
Alaıda, áskerılerge ótemaqy uzaq ýaqyt tólenbegen soń, 2016 jyldyń naýryz aıynda aıyptalýshy 4 áskerı qyzmetkerdi jınap alyp, «ótemaqy alý úshin meniń mınıstrlikte joǵary shendi adamdaryma 550 000 teńge jınap bersek, bizdiń ótemaqyny birden túsiredi» dep jalǵan ýáde bergen. Onyń Qorǵanys mınıstrliginde eshqandaı tanysy joq bolǵan, tıisinshe, ol áskerılerden jınap alǵan aqshany «kókesine» berýdi múlde oılamaǵan.
«Shamamen 2016 jyldyń aqpanynda kúdikti syıaqy retinde beriletin 550 000 teńge 450 000 teńgege deıin azaıdy dep, naýryz aıynan bastap 22 sáýirge deıin osy sharty týraly joǵarydaǵy áskerılerge birneshe ret aıtqan. Ol óziniń qylmystyq josparyn oryndaý jáne sharttaryn qabyldaǵan áskerı qyzmetshilerdiń aqsha qarajattaryn ıemdenip alý maqsatynda, 22 sáýirinde bir áskerımen birge Prıozersk qalasynyń Dostyq kóshesi boıynda ornalasqan «Halyq banki» AQ-nyń bólimshesiniń kassasyna kelip, aldaý jáne senimdi teris paıdalaný jolymen 450 myń teńgeni ári qaraı mınıstrliktegi laýazymdy tulǵalarǵa tapsyratyn tárizdi bolyp aldap, ıemdenip alǵan», - dep habarlady sot.
Jalpy, 2016 jyldyń 22 - 23 sáýir aralyǵynda, aıyptalýshy aǵa ofıtser Prıozersk qalasynda zańsyz jolmen aldaý arqyly áskerı qyzmetshilerdiń árqaısysynan 400 myńnan astam qarajatty jınap, barlyǵy 1,3 mln teńge ıemdengen.
«Sýdıa aıyptalýshynyń eki nemese odan da kóp adamǵa qatysty alaıaqtyq jasaǵany úshin QR QK-niń 58 babynyń 3 bólimine saı múlkin tárkileı otyryp, túpkilikti 7 jylǵa bas bostandyǵynan aıyrdy jáne Qarýly kúshter men jergilikti ózin-ózi basqarý jáne memlekettik organdarda memlekettik qyzmetpen aınalysý quqyǵynan ómir boıyna aıyrdy», - dep habarlady sot.
