Áskerılerge memlekettik nagradalar tabys etildi
ASTANA. KAZINFORM - Qorǵanys vedomstvosynda ulttyq mereke – Respýblıka kúnine arnalǵan saltanatty is-shara ótti. Bul týraly QM baspasóz qyzmeti habarlady.
Oǵan qorǵanys vedomstvosynyń basshylyǵy, qurylymdyq bólimshelerdiń bastyqtary men garnızonnyń áskerı qyzmetshileri qatysty.
Qorǵanys mınıstri general-polkovnık Rýslan Jaqsylyqov jeke quramdy aıtýly merekemen quttyqtady.
– Respýblıka kúni – elimizdiń eń basty meıramy, tarıhı kún, halqymyzdyń san ǵasyrǵy armany. Qazaqstannyń memlekettik egemendigi týraly deklaratsııa qabyldanǵan kúnge ulttyq mereke mártebesin qaıtarý barsha qazaqstandyqtar úshin mańyzdy, – dep atap ótti ol.
Mınıstr saıası, áleýmettik-ekonomıkalyq salalardyń jaqsarýyna toqtala otyryp, Qarýly kúshter eldiń osy jetistikterin, egemendigi men aýmaqtyq tutastyǵyn senimdi qorǵaýda turǵanyn atap ótti. Sondyqtan Qazaqstan Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaev joǵary halyqaralyq standarttarǵa saı keletin armııanyń kásibı quramdas bóligin nyǵaıtý máselelerine erekshe nazar aýdaryp otyr dedi.
Qorǵanys vedomstvosynyń basshysy kóktemgi sý tasqyny kezinde halyqqa kómek kórsetken sarbazdardy, serjanttar men ofıtserlerdi erekshe atap ótti.
– Qazaqstan aýmaǵynda jáne odan tys jerlerde ótkizilgen halyqaralyq oqý-jattyǵýlar áskerı qyzmetshilerdiń kásibı deńgeıiniń artqanyn kórsetti. Aldymyzda jaýapty mindetter men kúrdeli synaqtar kútip tur. Onyń bári bizdi aldaǵy iske sapaly, shyǵarmashylyq jáne kásibı turǵydan qaraýǵa mindetteıdi, – dep qorytyndylady Qorǵanys mınıstri.
Ulttyq merekege oraı elimizdiń qorǵanys qabiletin qamtamasyz etýge qosqan úlesi, áskerı jáne qyzmettik boryshyn úlgili oryndaǵany úshin Prezıdenttiń Jarlyǵymen 33 áskerı qyzmetshi memlekettik marapattarǵa ıe boldy.
El Prezıdentiniń qolynan ІІ dárejeli «Dańq» ordenin Áskerı-teńiz kúshteriniń bas qolbasshysy general-maıor Serik Borambaev aldy.
Qorǵanys vedomstvosynyń basshysy general-polkovnık Rýslan Jaqsylyqov birqatar áskerı qyzmetshilerge saltanatty jaǵdaıda ordender men medaldar tabys etti.
І dárejeli «Dańq» ordenimen avıatsııa general-leıtenanty Dáýren Qosanov, Baýyrjan Momyshuly atyndaǵy ІІ dárejeli «Aıbyn» ordenimen polkovnık Azamat Ábikenov marapattaldy.
Memlekettik nagrada – «Jaýyngerlik erligi úshin» medaline podpolkovnık Tımýr Sadrıev, maıor Erjigit Ismanov, kapıtan-leıtenant Jánibek Salyqbaev, aǵa leıtenant Ádilbek Sovethan, ekinshi synypty serjant Tımýr Gorbýnov jáne úshinshi synypty serjant Nurbol Bájıev laıyq dep tanyldy.
Mınıstrdiń buıryǵymen vedomstvolyq nagrada – «El qorǵany» medaldarymen bes, «Bitimgerlik operatsııaǵa qatysqany úshin» medaldarymen 11 áskerı qyzmetshi marapattaldy. 37 ofıtserge kezekti áskerı ataqtar merziminen buryn berildi.
