Áskerılerge baspana berý týraly jańa zań qandaı máselelerdi sheshedi

NUR-SULTAN. QazAqparat - Qorǵanys mınıstrligi áskerı qyzmetshilerdiń áleýmettik paketine engen ózgeristerdi túsindirdi, dep habarlaıdy QazAqparat.

Eske sala keteıik, búgin Qasym-Jomart Toqaev «Qazaqstan Respýblıkasynyń keıbir zańnamalyq aktilerine áskerı qyzmet jáne arnaýly memlekettik organdar qyzmetkerleri men áskerı qyzmetshilerdiń turǵyn úı qatynastary máseleleri boıynsha ózgerister men tolyqtyrýlar engizý týraly» Zańǵa qol qoıdy.

Bul ózgerister áskerı qyzmetshiler men arnaýly memlekettik organdar qyzmetkerleriniń áleýmettik paketin jaqsartýǵa, áskerı qyzmet ótkerý máselelerinde bolǵan olqylyqtar men qaıshylyqtardy retteýge baǵyttalyp otyr.

Atap aıtqanda, «Turǵyn úı qatynastary týraly», «Qazaqstan Respýblıkasynyń arnaýly memlekettik organdary týraly» jáne «Áskerı qyzmet jáne áskerı qyzmetshilerdiń mártebesi týraly» zańdarǵa túzetýler engizilýde.

Zańda qyzmettik turǵyn úılerdi jekeshelendirý, aqshalaı ótemaqy alý jáne arnaýly memlekettik organnyń qaıtys bolǵan (qaza tapqan) qyzmetkeriniń nemese áskerı qyzmetshiniń otbasy múshelerine paıdalaný quqyǵynyń aýysýy, qyzmettik turǵyn úılerdi qaldyq quny boıynsha nemese óteýsiz jekeshelendirý kózdelip otyr.

Budan ózge atalǵan ózgerister turǵyn úımen eki ret qamtamasyz etý jaǵdaıyn shekteýge de qatysty.

Qarýly kúshter, basqa da áskerler men áskerı quralymdar úshin alǵash ret «modýldik (mobıldi) turǵyn úı» uǵymy engizilip otyr.

Bul jabyq jáne oqshaýlanǵan áskerı qalashyqtardyń aýmaǵynda ornatylyp, tez turǵyzylatyn turǵyn úıler.

Zańǵa túzetýler engizý áskerı qyzmetshilerdiń quqyqtary men mindetterin keńeıtýdi, shyqqan ýaqyttan bastap úsh aıǵa deıingi merzimge jáne kelisimshart boıynsha áskerı qyzmetke qaıtadan kirgenge deıin áskerı qyzmettiń úzdiksizdigin belgileýdi kózdeıdi.

Osy ózgerister men tolyqtyrýlar attestattaý kezinde polıgrafologııalyq zertteý júrgizý máselelerin de qamtıtyn bolady.

Qujatqa abaısyzda zııan keltirgeni úshin materıaldyq jaýapkershilik shekteýi de saralandy. Sonymen qatar áskerı qyzmetshiler qasaqana nuqsan keltirilgen jaǵdaıda tolyq materıaldyq turǵyda jaýap beredi.

Áskerı qyzmetke kirý kezinde jas shekteýi 30 jastan 32 jasqa deıin, 6 aıǵa ulǵaıdy. Memlekettik organnyń birinshi basshysynyń sheshimi boıynsha áskerı qyzmetshige shekti jastan joǵary áskerı qyzmet merzimi bes jylǵa deıin uzartylýy múmkin.

«Qazaqstan Respýblıkasynyń arnaýly memlekettik organdary týraly» zańda áskerı qyzmetshilerdiń jáne arnaýly memlekettik organdar qyzmetkerleriniń qyzmet ótkerý tásilderin birizdendirýge baǵyttalǵan túzetýler de qarastyrylyp jatyr.