Áskerılerdiń psıhologııalyq jaı-kúıin endi JI baqylaıdy
ASTANA. KAZINFORM — Qorǵanys salasynyń mamandary áskerı bólimderdegi barlyq beınebaqylaý kameralaryn bir júıege biriktirip, oǵan jasandy ıntellekt engizýdi josparlap otyr. Jańa júıe sarbazdar men áskerı qyzmetkerlerdiń árbir áreketin jiti qadaǵalaıdy.
— Eger sarbaz qarýyn belgisiz baǵytta nemese erejege saı emes túrde paıdalanyp jatsa, beınekamera dereý dabyl qaǵýy tıis. Kamera mundaı áreketterdi tanýy úshin qyzmetkerler osy qozǵalysty birneshe ret qaıtalap kórsetip, júıege onyń qaýipti ekenin úıretedi. Sol sııaqty, adam bir jerde qulaǵan jaǵdaıda, jasandy ıntellekt bul jaǵdaıdy kúdikti belgi retinde tirkep, kezekshige nemese bólim komandırine habar berýge daǵdylanady. Bul — oqys oqıǵalardy, qyzmet tártibiniń buzylýyn nemese qaýip týdyrýy múmkin áreketterdi ýaqytyly anyqtaý úshin qajet, — deıdi QR Qorǵanys mınıstriniń orynbasary Darhan Ahmedıev.
Júıe tek sarbazdardyń emes, bólimshedegi barlyq tehnıkalardyń qozǵalysyn baqylaıdy.
— Qazir júıeni oqytyp jatyrmyz. Jasandy ıntellekttiń negizgi mindeti — áskerı quramnyń tolyqtyǵyn tekserý. Kim bar, kim joq? Kelmegen jaǵdaıda onyń sebebin anyqtaý. Sondaı-aq, barlyq tehnıkanyń ornynda turǵanyn baqylaý. Bizde arnaıy eseptik baza bar. Ony beınekameralarmen baılanystyramyz. Sol arqyly JI bólimsheden shyqqan tehnıkanyń nómirin kórip, qaı mashına ekenin jáne onyń qashan shyqqanyn avtomatty túrde anyqtap otyrýy tıis, — spıker.
Mınıstrdiń orynbasary ázirge pılottyq túrde jumys istep turǵan joba kúnine birneshe olqylyqty anyqtap otyrǵanyn jetkizdi.
— Bul jumystyń bári josparǵa engizilgen. Qazirgi kezeńde jobany pılottyq rejımde Astana, Semeı, Aıagóz jáne Almaty qalalarynda synaqtan ótkizip jatyrmyz. Júıe buǵan deıin birneshe ret «tútin shyǵý», «qyzmet ornyn ruqsatsyz tastap ketý» sııaqty derekterdi anyqtady. Jalpy kúnine birneshe osyndaı derekti tirkep otyrady, — deıdi Darhan Ahmedıev.
Aıta keteıik, Qorǵanys mınıstrligi tsıfrlyq júıeler áskerı qyzmetke shaqyrýdyń barlyq negizgi kezeńderin jeńildetkenin málimdedi.