Áskerılerdiń balalaryna Qazaq anımatsııasynyń altyn qory kórsetildi
ASTANA. KAZINFORM — Jalpyrespýblıkalyq «Naýryznama» onkúndigine oraı elordadaǵy Qarýly kúshterdiń Ulttyq áskerı-patrıottyq ortalyǵynda mýltfılmder kórsetilimi ótti, dep habarlaıdy QR Qorǵanys mınıstrliginiń baspasóz qyzmeti.
Mýltıplıkatsııalyq fılmder tsıkliniń kommertsııalyq emes kórsetilimin Sháken Aımanov atyndaǵy «Qazaqfılm» kınostýdııasy janyndaǵy «Qazaqanımatsııa» shyǵarmashylyq birlestigi uıymdastyrdy. Bul is-shara Prezıdenttiń ulttyq anımatsııany damytý jáne aýdıovızýaldy ónim naryǵyn memlekettik tildegi sapaly kontentpen toltyrý týraly tapsyrmasyn oryndaý maqsatynda júzege asyrylýyp jatyr.
Otandyq úzdik anımatsııalyq týyndylardy tamashalaýǵa áskerı qyzmetshilerdiń, azamattyq personaldyń, Qarýly kúshter ardagerleriniń balalary men nemereleri, sondaı-aq shyǵarmashylyq vzvodtyń sarbazdary keldi.
Sharany Ulttyq áskerı-patrıottyq ortalyǵy bastyǵynyń orynbasary podpolkovnık Erbolat Júsipov ashyp, atalǵan jobanyń mádenı murany, rýhanı qundylyqtardy saqtaý men memlekettik tildi damytýdaǵy aıtarlyqtaı mańyzyna toqtalyp ótti.
«Qazaqfılm» kınostýdııasy janyndaǵy «Qazaqanımatsııa» shyǵarmashylyq birlestiginiń prodıýseri Aınur Isaeva atap ótkendeı, Ulttyq áskerı-patrıottyq ortalyqtyń qoldaýymen uıymdastyrylǵan mundaı kórsetilimder endi Abaı, Gvardeısk, Saryózek jáne Almaty garnızondarynda da ótetin bolady.
— Kórermender nazaryna túrli aýdıtorııanyń talǵamyna saı janrlar usynylady. Onyń ishinde tolyq metrajdy anımatsııalyq ertegilerden bastap qysqa metrajdy avtorlyq kınolarǵa deıin bar. Budan basqa jas kórermender 2025 jyldyń eksklıýzıvti premeralaryn jáne «Qazaqfılm» men Ulttyq kınony qoldaý memlekettik ortalyǵynyń altyn qorynan alynǵan anımatsııalyq lentalardy da tamashalaı alady, — dedi ol.
Shara Mádenıet jáne aqparat mınıstrligi men Ulttyq kınony qoldaý memlekettik ortalyǵynyń kómegimen ótip jatqanyn esterińizge sala keteıik.
Budan buryn Qazaqstanda tegin kórsetilimdermen anımatsııa aptalyǵy ótip jatqanyn jazdyq.
