Áskerılerdiń 1,4 mlrd teńge kredıttik tólemi keıinge qaldyryldy
Qazaqstanda 5 myńnan asam áskerı qyzmetshilerdiń 1,4 mlrd teńge kredıttik tólemi keıinge qaldyryldy. Astana qalasy Qorǵanys isteri departamentiniń bastyǵy Aıdyn Saǵynbekov áskerılerdiń áleýmettik jaǵdaıyn jaqsartý sharalary týraly aıtyp berdi, dep habarlaıdy QazAqparat tilshisi.
«Prezıdent tapsyrmasymen qorǵanys vedomstvosy múddeli memlekettik organdarmen birlesip, merzimdi áskerı qyzmetshiler men olardyń otbasy músheleriniń áleýmettik jaǵdaıyn jaqsartýǵa baǵyttalǵan merzimdi áskerı qyzmettiń bedeli men tartymdylyǵyn arttyrý boıynsha jumysty júrgizýde. Búgingi tańda merzimdi áskerı qyzmetshilerge kredıttik demalys usyný sharalary iske asyrylýda», - dedi Aıdyn Saǵynbekov Astana kommýnıkatsııalar qyzmetinde ótken brıfıngte.
Spıkerdiń aıtýynsha, 2022-2023 jyldary 8,5 myń áskerı qyzmetshide bankterde jáne mıkroqarjylyq uıymdarda 3,2 mlrd teńge somasyna 20,3 myń kredıt bar. Búgingi tańda 8 800 qaryz ben mıkrokredıtter boıynsha 5 000-nan asa áskerı qyzmetshilerdiń 1,4 mlrd teńge tólemderi keıinge qaldyryldy.
Sonymen birge, joǵary jáne joǵary bilimnen keıingi bilim berýde 70-ten astam mekeme merzimdi áskerı qyzmet ótkergen adamdarǵa bilim berýde qosymsha jeńildik usyný jóninde Qorǵanys mınıstrligimen kelisimge qol qoıdy.
Búgingi tańda áskerde qyzmet ótkergen 180-nen astam qazaqstandyq aqysyz negizde, 400-den astamy aqyly negizde joǵary oqý oryndaryna tústi.
Aıta keteıik, Qazaqstanda azamattardy kúzgi merzimdi áskerı qyzmetke shaqyrý naýqany bastaldy. 2023 jylǵy 28 jeltoqsanǵa deıin Qarýly Kúshterdiń, basqa da áskerler men áskerı quralymdar qataryn 18 ben 27 jas aralyǵyndaǵy 19 myńnan astam er azamat tolyqtyrady. Sonyń ishinde myńnan astamy Astana qalasynan shaqyrylady.
