Áskerılerdiń halyqaralyq «Altyn úki» jarysy jalaýyn kóterdi
ASTANA. 11 shilde. QazAqparat. Búgin Qazaqstan Respýblıkasy Qarýly Kúshteri Qurlyq áskerleriniń «Spassk» oqý ortalyǵynda mergen juptardyń jáne arnaıy maqsattaǵy barlaýshy toptardyń daıarlyǵyn synaıtyn Halyqaralyq «Altyn úki» jarysy jalaýyn kóterdi.
Jarysty saltanatty túrde ashý rásimine Mınıstrdiń birinshi orynbasary - QR QM Shtabtar bastyqtary komıtetiniń tóraǵasy general-polkovnık Sáken Jasuzaqov keldi, dep habarlaıdy vedomstvonyń baspasóz qyzmeti.
Alty kún boıy áskerı qyzmetshilerdiń aıyzyn qandyratyn atalmysh jarysqa baqtaryn synaýǵa Qazaqstan armııasynyń, Reseı Federatsııasynyń, Belarýs Respýblıkasynyń, Ulybrıtanııa, Iordanııa men Ýkraınanyń áskerı qyzmetshileri qatyspaq. Sondaı-aq, sharanyń barysyn Qazaqstanda tirkelgen Áskerı dıplomatııalyq korpýs baqylamaq.
Jarystyń basty mindeti - kásibı tásilder men jattyǵýlardy oryndaýdyń ádisterin jetildirý, áskerı qyzmetshilerdiń dalalyq jaǵdaıda atý deńgeıin, kúrdeli jaǵdaıda júktelgen tapsyrmany oryndaýdaǵy daıarlyq dárejesin anyqtaý, qıyn-qystaý kezeńdegi jaýyngerlerdiń shydamdylyqtaryn tekserý, tájirıbe almasý, barlaý toptarynyń is-áreketi kezinde paıdalanylatyn tyń ádis-tásilderdi jáne jańa qarý-jaraq pen arnaıy tehnıkanyń múmkindigin zertteý.
- Jarysqa qatysýshylardy qarsy alyp turǵanyma qýanyshtymyn, - dedi general-polkovnık Sáken Jasuzaqov. - Osy sekildi is-sharalar bizdiń elderdiń áskerı vedomstvolary arasyndaǵy ózara is-qımyldardyń deńgeıin arttyra túseri sózsiz. Barlyq qatysýshylarǵa birlesken jumystary, áriptestikteri jáne belsendilik tanytqandary úshin rızashylyǵymdy bildiremin. Sizderge tabys pen jeńis tileımin!
Saıystyń alǵashqy kúni qatysýshylar jarystyń arnaıy túrleri boıynsha normatıvter tapsyryp, toptardyń jaýyngerlik tapsyrmany oryndaýǵa ázir ekendikterin kórsetti. Pıstolet pen avtomattan atý jattyǵýlaryn olar bir orynda turyp, júrip bara jatyp ártúrli qolaısyz jaǵdaılarda oryndady.
Shara barysynda áskerı qyzmetshiler atý, júgirý, sýyq qarýdy sheber meńgerý, qoıan-qoltyq urysta qoldanylatyn ádisterdi jetildirý, desant bolyp túsý, áskerı-medıtsınalyq ázirliktegi jetistikterin, jarylǵysh zattardy zalasyzdandyrýda jınaǵan mol bilimderi men tájirıbelerin tanytyp qana qoımaı, óte qıyn ári qaýipti jaǵdaıda ómirlerin saqtaı alatyndyqtaryn, máselen sirińke joqta ot jaǵyp, taǵam ázirleý sııaqty jattyǵýlardy jurtshylyq nazaryna usynbaq.
Mundaı halyqaralyq jarystar 2008 jyldan beri ótkizilip kele jatqanyn atap ótken jón, biraq beriletin tapsyrmalar jyldan jylǵa aýyrlamasa jeńildegen emes. Bul tórtinshi ret ótkizilip otyrǵan jarys.
