Áskerılerdiń densaýlyǵyn qadaǵalaıtyn maman
ALMATY. QazAqparat – Adam ómirin uzartýǵa septigin tıgizip, ajaldan arashalaýshy dáriger mamandyǵyn halqymyz ejelden qasterlep, qurmettegen. Kásibı merekeni densaýlyq saqtaý salasynyń barlyq qyzmetkeriniń eren eńbegin dúıim jurtshylyq baǵalaıtyn kún deýge bolady.
Almaty qalasynda ornalasqan 7552 áskerı bóliminiń medıtsına mamany, aǵa serjant Janat Jıenbaeva áskerı mamandardyń densaýlyǵyn qadaǵalaıdy. Bul salada júrgenine 15 jyldan asqan ol áskerı tártipke de baǵynyp, otbasy jylýyn da saqtap otyrǵan aq halatty abzal jan. Janat bos ýaqytynda óziniń mamandyǵy jaıynda bilimin jetildirip otyrady.
«Bala kezden medıtsına salasyn qyzyqty ári jaýapkershiligi kóp jumys dep esepteıtinmin. Otbasymda áskerı adamdar da, medıtsına ókilderi de bar. Bir jaǵynan áskerı kıim kıip, bolattaı myqty tártibi bar jumysty qarastyrdym. Ekinshiden, adamdarǵa barynsha kómek kórsetkim kelgen edi. Sondyqtan mektepte 9-synyptan keıin medıtsına salasyn tańdaımyn dep sheshtim. Oqý ornyn qyzyl dıplomǵa bitirgen soń, Ulttyq ulanda jumys oryndary bar ekenin bilip, alǵan mamandyǵyma saı qyzmet atqara bastadym. Ózim otbasymda áskerı adamdar bolǵan soń, bala kezden tártip boldy. Sondyqtan jumysta asa qıyndyq bolmady desem, artyq aıtpaspyn. Kózdi ashyp-jumǵansha Otanǵa qyzmet etip júrgenime 15 jyl bolypty», – deıdi Janat Alpamysqyzy.
Maqsat Jaqsylyqov
