Áskerılerdi túski aspen qamtamasyz etýge bıýdjettin 1,5 mlrd teńge bólinedi

ASTANA. QazAqparat - Áskerılerdi túski aspen qamtamasyz etýge bıýdjettin 1,5 mlrd teńge bólinedi. Bul týraly búgin Májiliste «Qazaqstan Respýblıkasynyń keıbir zańnamalyq aktilerine qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.

«Zań jobasynda respýblıkalyq bıýdjetten qosymsha shyǵysty talap etetin bir ózgertý bar. Atap aıtqanda, 1,5 mlrd teńge QR Qorǵanys Kúshteriniń áskerı qyzmetshilerin túski aspen memleket esebinen qamtamasyz etýge kózdeledi. Bul usynys respýblıkalyq bıýdjet komıssııasynda byltyrǵy jyldyń sońyna taman qaralyp, tujyrymdamaly túrde qoldaý tapty», - dedi Qorǵanys mınıstriniń orynbasary Talǵat Muhtarov.
Onyń aıtýynsha, zań jobasyn qabyldaý áskerı qyzmetshilerdiń, qyzmetkerlerdiń jáne olardyń otbasy músheleriniń áleýmettik-quqyqtyq mártebesin nyǵaıtýǵa septigin tıgizedi. «Qyzmettik-jaýyngerlik is-qımyldarǵa azamattardyń qyzyǵýshylyǵyn arttyrý da qarastyrylyp otyr. Budan bólek, Qazaqstannyń tutastaı qorǵanys qabiletin, áskerı qyzmetshiler men arnaýly memlekettik organdardyń mártebesin arttyrý jolymen ulttyq qaýipsizdikti nyǵaıtý qamtamasyz etiledi. Qazaqstannyń qorǵanys salasyndaǵy mindetterine, tómen jáne ortasha janjaldardyń jolyn kesýge qarýly kúshter men basqa da memlekettik organdardy daıarlaýǵa mán beriledi», - dedi mınıstr orynbasary.