Áskerılerdi koronavırýstan qorǵaý úshin qandaı shara atqaryldy

NUR-SULTAN. QazAqparat – QR Qorǵanys mınıstri Nurlan Ermekbaev sarbazdardy koronavırýstan qorǵaý úshin qandaı shara jasalǵanyn aıyp berdi, dep habarlaıdy QazAqparat tilshisi.

«Qarýly Kúshterde adam sany aıtarlyqtaı kóp, sondyqtan barlyǵyna jıi-jıi test júrgizetin múmkindik joq. Biraq, bul jumystar bas sanıtarlyq dárigerdiń qaýlysyna nemese vedomstvoaralyq komıssııanyń sheshimine sáıkes júrgiziledi. Barlyq qaýip toptary, áskerge shaqyrylǵandar jáne zapasqa shyǵatyndar PTR-testileýden ótedi. Odan da basqa qaýipsizdikti qamtamasyz etý boıynsha sharalary qarastyrylǵan. Baqylaý-ótkizý beketinde vızýaldy tekserý, qashyqtan termometrııa jáne kelýshilerge saýalnama júrgiziledi. Rejım boıynsha shekteýler bar, bóten adamdarǵa áskerı bólim aýmaǵyna kirýge jáne áskerı qyzmetshiler, merzimdi qyzmet pen kýrsanttardyń syrtqa shyǵýyna ýaqytsha tyıym salyndy», - dep jaýap berdi N. Ermekbaev Ortalyq kommýnıkatsııalar qyzmetinde tilshi suraǵyna.

Oqý synyptary men aýdıtorııalarda jáne jatyn úı-jaılarda áskerıler keminde 2 metr qashyqtyqta ornalasqan.

«Qazir bir áskerı qyzmetshige arnalǵan tekshe metr aýa jáne sanıtarlyq torap standarttaryn ózgertý jóninde jumys istep jatyrmyz. Sonymen qatar, bólmeni jıi jeldetý, ylǵaldy tazalaý, barlyq jerde dezınfektsııa quraldarynyń bolýy jáne betperde kııý mindetteldi, áskerı bólimderde qol alysýǵa tyıym salynady. Turaqty túrde áskerılermen áńgime-suhbat júrgiziledi, vırýstan saqtaný joldary túsindiriledi», - deıdi Qorǵanys mınıstri.

Sonymen birge, Qorǵanys mınıstrligi bıýdjet qarajatynsyz, demeýshilik kómekpen 2 PTR-zerthana ashqan, olar Nur-Sultan jáne Almaty qalalarynda ornalasqan.

«Oǵan qosa, Úkimettiń qarjy-ekonomıkalyq bóliminiń qoldaýymen taǵy eki PTR-zerthana jabdyqtadyq. Birneshe PTR jınaqtary men quraldardy sheteldik áskerı vedomstvolardaǵy áriptesterimiz qaıtarymsyz kómek retinde jiberdi. Osylaısha, barlyq garnızonymyzdy qamtýǵa tyrysyp jatyrmyz. Azamattyq zerthanalarmen de kelisimder bekitilgen, ıaǵnı barlyq garnızondaǵy áskerılerimiz ádettegi zerthanalarǵa baryp, test tapsyra alady», - dedi Nurlan Ermekbaev.

Buǵan deıin Qorǵanys mınıstri 2 myńnan astam áskerı qyzmetshiniń koronavırýspen aýyrǵanyn aıtqan edi.