Áskerılerdi baspanamen qamtamasyz etý: Qaýyrt jeli ashyldy
«QR Qorǵanys mınıstriniń orynbasary general-leıtenant Talǵat Muhtarovtyń jetekshilik etýimen bas basqarmalardyń, túrlerdiń, ásker tekteriniń, áskerı bólimderdiń zań qyzmetterimen, óńirlik paıdalaný bólimderiniń ókilderimen, Aqmola garnızonynyń zańgerlerimen turǵyn úı qarym-qatynastary máseleleri jóninde Qazaqstan Respýblıkasynyń zańnamalyq aktilerine engizilgen ózgerister men tolyqtyrýlar boıynsha selektorlyq keńes ótkizildi», - dep atap ótilgen vedomstvonyń taratqan málimetinde.
Osyǵan oraı, otyrysta turǵyn úı qarym-qatynastary máseleleri jóninde Qazaqstan Respýblıkasynyń zańnamalyq aktilerine engizilgen ózgerister men tolyqtyrýlardy iske asyrý tártibiniń máseleleri qaraldy.
Atap aıtqanda, qosymsha áskerı qyzmetshilerdi baspanamen qamtamasyz etýdiń jańa tetigi máseleleri boıynsha túsindirme jumysyn sapaly júrgizý úshin barlyq 18 óńirlik paıdalaný bóliminde qaýyrt jeli ashyldy. Olardyń nómirlerin áskerı qyzmetshiler aqparattyq stendter men QR Qorǵanys mınıstrliginiń www.mod.gov.kz. resmı saıtynan bile alady.
Budan buryn habarlanǵandaı, áskerı qyzmetshilerdi baspanamen qamtamasyz etý júıesin jetildirý maqsatynda Memleket basshysy áskerı qyzmettiń bedelin, áskerı qyzmetshiler men olardyń otbasy músheleriniń áleýmettik-quqyqtyq mártebesin arttyrýǵa baǵyttalǵan «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» Zańǵa qol qoıdy.
Esterińizge sala keteıik , qarasha aıynyń sońynda Senatta QR Qorǵanys mınıstriniń orynbasary Talǵat Muhtarov 2018 jyldan bastap áskerı qyzmetshiler ótemaqy esebinen ıpoteka ala alatynyn aıtqan edi. 
«Zań jobasynyń maqsaty men mańyzy turǵyn úıge muqtaj barlyq áskerı qyzmetshilerdiń sanattaryn jeke baspanamen qamtamasyz etý bolyp tabylady. Qarastyrylyp otyrǵan tetikterge toqtalsaq, áskerı qyzmetshilerge ekinshi deńgeıli bankterdegi jeke arnaýly esep-shotyna aı saıyn turǵyn úı tólemderi aýdarylatyn bolady. Turǵyn úı tólemderiniń mólsheri elimizdiń tıisti óńirindegi baspananyń 1 sharshy metr qunyn áskerı qyzmetshiniń otbasy músheleriniń árqaısysyna tıesili paıdaly aýdan normalaryna, ıaǵnı bir adamǵa shaqqanda 18 sharshy metrge kóbeıtý arqyly esepteledi»,- dedi T. Muhtarov .
Áskerı qyzmetshiler osy turǵyn úı tólemin (baspanany jalǵa alǵany úshin ótemaqy - red.) kelesi maqsattarǵa jumsaı alady: ıpotekalyq nesıeni paıdalana otyryp, baspanany satyp alýǵa; turǵyn úı arendasyn tóleýge, sonyń ishinde baspanany keıinnen satyp alý quqyǵymen jalǵa alýǵa; úlestik baspana qurylysyna turǵyn úı qurylys kooperatıvine qatysqan kezde jarnalardy tóleýge; turǵyn úı qurylysy jınaqtaryn jınaýǵa jáne baspana jaǵdaılaryn jaqsartýǵa.
