Áskerıler Zımbabve prezıdentin tutqynǵa aldy - BAQ
ASTANA. QazAqparat - Zımbabveniń áskerıleri eldi 1980 jyldan beri basqaryp kele jatqan respýblıka prezıdenti men onyń áıeli Greısti qamaýǵa aldy.
Bul jaıly sársenbi, 15 qarasha kúni áskerı qyzmet ókilderiniń málimdemesine silteme jasaǵan Associated Press málim etti.
Buǵan deıin ásker qarjy mınıstrin tutqyndap, memlekettik telekompanııa ǵımaratyn baqylaýǵa alǵan bolatyn.
14 qarasha kúni keshke qarýlanǵan áskerler Zımbabve astanasy Hararede mańyzdy pozıtsııada turdy. Zımbabve áskeri qalyptasqan jaǵdaıdy «qan tógissiz túzetýge» balap, áskerı tóńkeris dep ataýdan bas tartty.
Olardyń aıtýynsha, memleket basshysy men onyń otbasyna tóngen qaýip joq.
Áskerı qyzmet ókilderi respýblıka azamattaryn «el ıgiligi úshin áskerı qyzmetkerlermen birlese qyzmet etýge» shaqyrdy.
