Áskerıler jattyǵýy aıasynda arnaıy operatsııa ótkizildi - QR QM
Bul týraly QR QM baspasóz qyzmetinen habarlandy.
Arnaıy operatsııany ótkizý týraly nusqaý jattyǵýdy uıymdastyrýshylar tarapynan kenetten berildi.
Operatsııa boıynsha 15 shekarashysy bar zastava men 20 turǵyny bar eldi mekenge kenetten belgisiz lańkestik top shabýyl jasaıdy. Bul úshin polıgonda shartty túrdegi zastava men eldi meken jasaldy. «Ońtústik» óńirlik qolbasshylyǵynyń bir bólimshesiniń jaýyngerleri lańkesterdiń rólinde is-qımyl tanytty.
Eldi mekendi terrorısterden azat etý úshin oǵan erekshe daıyndalǵan desantty-shabýyldaýshylar brıgadasy qoldanyldy. Desantshylar qas-qaǵym sátte eldi mekendi qorshaýǵa alyp, qutqarý jumystaryn júrgizdi.
Arnaıy operatsııa barysynda jaýyngerlerdiń baıypty daıyndyq deńgeıleri men tapsyrmany kez kelgen jaǵdaıda oryndaıtyndyǵy, sondaı-aq komandırlerdiń jaǵdaıdyń tez almasýy barysynda tıimdi ári naqty sheshim qabyldaı alatyndyǵy baıqaldy.
«Biz memlekettiń qaýipsizdigi múddesi úshin Qarýly Kúshter túrleri, ásker tekteri jáne barlyq áleýetti qurylymdardyń ózara is-qımylyn qarýly kúreske qarsy paıdalanýdyń tıimdi joldaryn únemi izdestirip kelemiz. Bizdiń bolashaqta jetile túsýimizdi anyqtaıtyn faktor el Prezıdentiniń ulttyq qaýipsizdikke, sonymen birge Qazaqstan Qarýly Kúshteriniń damýyna basty nazary ári zamanaýı kózqarasy,-dep atap ótti oqý-jattyǵýdyń jetekshisi Qurlyq áskerleriniń bas qolbasshysy general-leıtenant Murat Máıkeev.
«Shoqpar-2013» jedel-taktıkalyq komandalyq shtabtyq jattyǵýyna «Ońtústik», «Astana» óńirlik qolbasshylyǵynyń qurylymdary men bólimderi, Aeroutqyr áskerleri, Áýe qorǵanysy kúshteriniń armııalyq avıatsııasy jáne basqa da áleýettik qurylymdardyń ókilderi qatysýda. Jattyǵýǵa barlyǵy tórt jarym myńnan astam áskerı qyzmetshiler tartylǵan.