Áskerıler zamanaýı baılanys quraldaryn meńgerýde (FOTO)

ASTANA. QazAqparat - Qapshaǵaı qalasyndaǵy «Qazbat» qazaqstandyq bitimgershilik batalonynyń bazasynda qazaqstandyq áskerı qyzmetshiler úshin «Harrıs» radıostantsııalaryn paıdalanýǵa jáne olardy «Hammer» avtomobılderine ornatý tártibine oqytý boıynsha kýrs bastaldy. Bul týraly Qorǵanys mınıstrliginiń baspasóz qyzmeti habarlady.

Oqýǵa «Harrıs» baılanys quraldaryn ornatý, retke keltirý jáne paıdalaný qaǵıdattary jóninde óz bilimderin jetildiretin «Qazbat» baılanysynyń mamandary tartyldy.

«Radıostantsııalar Qazaqstan men AQSh-tyń qorǵanys vedomstvolary arasyndaǵy bes jyldyq yntymaqtastyq jospary jáne «Bitimgershilik operatsııalar boıynsha jahandyq bastama» (GPOI) baǵdarlamasy sheńberinde «Qazbat» qazaqstandyq bitimgershilik batalonyn jasaqtaý úshin 2015 jyly AQSh Úkimetimen aqysyz negizde jetkizilgen», delingen habarlamada.

Radıostantsııalar «Qazbattyń» jaýyngerlik daıarlyǵy úderisinde taptyrmas qural jáne NATO standarttary boıynsha tolyǵymen úılesken. Bul «Dala qyrany» bitimgershilik oqý-jattyǵýy, onyń ishinde 2014 jyly Germanııada ótkizilgen oqý-jattyǵý barysynda birneshe márte rastaldy.