Áskerıler úshin qandaı baspana tólemderi qarastyrylǵan

NUR-SULTAN. QazAqparat – Jaýyngerlerdi páterge ornalastyrý bas basqarmasy turǵyn úı basqarmasynyń ókili, ádilet podpolkovnıgi Dáýrenbek Jumabek áskerı qyzmetshiler turǵyn úımen qalaı qamtamasyz etiletinin aıtty, dep habarlaıdy QazAqparat.

Dáýrenbek Jumabek 2018 jyly turǵyn úı zańnamasy ózgertilgennen keıin áskerı qyzmetshilerdi turǵyn úımen qamtamasyz etý qanshalyqty jaqsardy degen suraqqa jaýap berdi.

«Engizilgen túzetýler áskerı qyzmetshilerdiń áleýmettik jaǵdaıyn jaqsartqany sózsiz. Baǵdarlama ózgerdi, biz qyzmettik turǵyn úı berip qana qoımaı, olardyń jeke arnaıy shotyna turǵyn úı tólemderin aýdara bastadyq. Endi áskerı qyzmetshiler turǵyn úıdi jeke menshikke nemese jalǵa alý quqyǵyn paıdalana alady. 2018 jyldan bastap engizilgen túzetýlerden bastap jeti myńnan astam áskerı qyzmetshi menshigine turǵyn úı satyp aldy. Jekeshelendirý quqyǵymen salystyrǵanda bul áldeqaıda kóp», - dep atap ótti ol Qorǵanys mınıstrliginiń apta saıynǵy onlaın-brıfınginde.

Onyń aıtýynsha, buryn áskerı qyzmetshiler jyl saıyn shamamen 400 páterdi jekeshelendire alatyn.

«Biz olardy birden páter satyp alýǵa mindettemeımiz. Páter tańdaýyna, úılenip, otbasyn keńeıtýine ýaqyt beriledi. Bul kezde turǵyn úıge aqsha jınaqtaı alady. Tipti ıpotekany resimdemeı-aq jınaýyna bolady», - dep túsindirdi Dáýrenbek Jumabek.

Ol jaýapsyz qurylys merdigerlerine tap bolǵan áskerı qyzmetshilerdiń problemasyna da toqtaldy.

«Áskerı qyzmetshiler satyp alatyn turǵyn úıdi óz betinshe tańdaıtynyn eskersek, shyn máninde osyndaı qurylys salýshylarǵa tap bolýy múmkin. Zań júzinde olar merdigerden aqshany bankke qaıtarýdy talap ete otyryp, aradaǵy kelisimshartty buza alady. Bul rette olar turǵyn úı tólemderin paıdalaný maqsatyn da ózgerte alady, ıaǵnı basqa turǵyn úıdi tańdaǵanǵa deıin aı saıyn páter jaldaýǵa aqsha beriledi», - dedi Dáýrenbek Jumabek.