Áskerıler órt shalǵan ıesiz ǵımarattan adamdy qutqardy
SEMEI. QazAqparat – Semeı qalasyndaǵy «Shyǵys» óńirlik qolbasshylyǵynyń áskerıleri kóshelerdi patrýldeý kezinde er adamdy órtten qutqaryp, izdeýde júrgen qylmyskerdi ustady, dep habarlaıdy QazAqparat.
Semeıde koronavırýstyń taralýyn boldyrmaý maqsatynda qosymsha shekteý sharalary engizilgennen keıin «Shyǵys» ÓQ áskerıleri jáne Ulttyq ulan sarbazdary birlesip, qoǵamdyq oryndarda tártipti qadaǵalaýda.
«Patrýldeý barysynda eki áskerı qyzmetshi – aǵa serjant Qýanyshbek Aısaýlın men aǵa serjant Talǵat Saıfýllın Chehov kóshesiniń boıyndaǵy órt shyqqan ıesiz ǵımarattan bir adamdy qutqaryp, tilsiz jaýdy aýyzdyqtady. Keıin áskerıler oqıǵa ornyna jádel járdem shaqyrǵan», - delingen «Shyǵys» óńirlik qolbasshylyǵynyń baspasóz qyzmeti taratqan málimette.
Sondaı-aq Shákárim dańǵyly men Sevastopolskaıa kóshesiniń qıylysynda aǵa serjant Aslan Shujyqbaev pen serjant Erkebulan Oraztaev qosymsha shekteý sharalaryn buzǵan adamdy ustady. Áskerı qyzmetkerler ony bekinis pýnktine jetkizgen. Anyqtalǵandaı, bul azamat Shyǵys Qazaqstan oblysynyń Aıagóz aýdanynda izdeýge bolǵan. Polıtsııa basqarmasynyń ókilderi «Shyǵys» ÓQ áskerılerine qyraǵylyqtary men jedel áreketteri úshin rızashylyq bildirdi.
