Áskerıler elimizde shyǵarylǵan arnaıy qaýipsizdik tosqaýyldaryn aldy

ASTANA. QazAqparat - Armııaǵa «Qazaqstan ınjınırıng» UK» AQ-nyń enshiles kásiporny otandyq S. Kırov atyndaǵy mashına qurastyrý zaýytynda shyǵarylǵan tótenshe jaǵdaılar kezinde qoldanylatyn arnaıy qaýipsizdik tosqaýyldary berildi, dep habarlaıdy Qorǵanys mınıstrliginiń baspasóz qyzmeti.

«2015 jyly qazaqstandyq armııanyń muqtajdyǵy úshin zaýyt ónimniń jańa túri, ıaǵnı, tótenshe jaǵdaılarǵa arnalǵan arnaıy qaýipsizdik bógetin ıgerdi. Kásiporyn tıisti qurastyrý jáne tehnologııalyq qujattama jıyntyǵyn ázirledi, óndiristi daıyndaýdy júzege asyrdy», delingen habarlamada.

Memlekettik qorǵanys tapsyrysyn oryndaý sheńberinde 2015 jyldyń qarasha-jeltoqsan aılarynda Qarýly Kúshterge, ıaǵnı, 68602 áskerı bólimine 2 myń tosqaýyl jetkizildi.

«Arnaıy qaýipsizdik bógeti birneshe segmentten quralǵan bólshekteletin jınalmaly torly qurylymnan turady. Onyń árqaısysynyń ishinde geometkelden jasalǵan japsyrma ornatylady. Tosqaýyl áskerı is-qımyldar men lańkestikke qarsy is-sharalar kezinde fortıfıkatsııalyq qurylystardy tez arada turǵyzý úshin arnalǵan. Sondaı-aq ony ózender men sý qoımalarynyń jaǵalaryn bekitý úshin qoldanýǵa bolady», delingen habarlamada.

Ónim -40°S-tan + 50°S-qa deıingi temperatýrada ashyq aýada paıdalanylýǵa shydas beredi. Mundaı arnaıy qaýipsizdik tosqaýyldary AQSh, Izraıl jáne Reseı áskerıleri jıi qoldanyp júrgenin aıta ketken jón.