Áskerıler, dárigerler men eriktiler: Prezıdent Arysty qalpyna keltirgenderdi marapattady
Jarylysta eńbek etken áskerıler, eriktiler, balabaqsha qyzmetkerleri (jalpy 40 adam) ІІ jáne ІІІ dárejeli «Aıbyn» ordenimen, «Qurmet» ordenimen, «Erligi úshin» jáne «Jaýyngerlik erligi úshin» medaldarymen, medıtsına qyzmetkerleri – «Shapaǵat» medalimen marapattaldy.
«Arystaǵy tragedııa jergilikti myńdaǵan otbasyn bir sátte baspanasyz qaldyrdy. Áskerı oq-dárilerdiń jarylysynan ǵımarattar men úılerdiń 90% nuqsan keldi. Áskerıler men quqyq qorǵaý organdary qyzmetkerleriniń shapshańdyǵy men batyldyǵy alǵashqy mınýttarda-aq halyqty evakýatsııalaýǵa múmkindik berdi. Sol sátte jańa jarylys qaýpinen qoryqpaǵan batyrlar aramyzda otyr», - dedi Prezıdent.
Mysal retinde Prezıdent aǵa serjant Nurjan Baqtybaevty atap ótti. Onyń órt saldaryn joıýdaǵy tabandylyǵy adamdardy jańa qaýip-qaterden saqtap qaldy.
«Endi bizge osyndaı ondaǵan oqıǵa belgili. Jigitterdiń árqaısysy batyrlyq, beriktik pen erlik kórsetti. Sol kúni Arysqa ushyp baryp, jergilikti turǵyndarmen kezdesip, oqıǵanyń aýqymyn óz kózimmen kórdim. Jaýapty qurylymdarǵa halyqty ýaqytsha jaıǵastyrýǵa, tez arada qurylysty bastaýǵa tapsyrma berdim. Oqıǵa eshkimdi beı-jaı qaldyrmady. Arysty búkil el bolyp qalpyna keltirdik. Qazaqstannyń árbir azamaty óz úlesin qosty. Turǵyndar, kásipkerler, eriktiler Qazaqstannyń túkpir-túkpirinen jınaldy», - dedi ol.
Sonymen birge, Memleket basshysy Arysqa barǵan eriktilerdi «Qurmet» ordenimen marapattady.
«Qaraǵandylyq Evgenıı Hısmetov júzdegen eriktilermen birge 50 kún gýmanıtarlyq kómek taratýdan bastap, qurylys jumystaryna qatysty. Qalany qalpyna keltirýge aıryqsha úles qosty. Kásipker Berik Qanıevtiń jeke qarajatyna qala kósheleri jóndeldi. Mundaı patrıottyq úlgisi óte kóp. Osyndaı jarqyn mysaldar men ózara kómek arqyly jastardy tárbıeleýimiz kerek», - dedi Q. Toqaev.
Prezıdenttiń aıtýynsha, Arysty qalpyna keltirýge 10 myń adam, 250 kompanııa jáne 300-ge jýyq arnaıy tehnıka jumyldyryldy. Qazirgi ýaqytta nysandardyń 97% jóndeý jumystary aıaqtaldy.
