Áskerıler Belgııadaǵy evreı qaýymdastyqtarynyń qaýipsizdigin qamtamasyz etedi
ASTANA. KAZINFORM — 23 naýryzda evreı qaýymdastyqtarynyń dinı oryndary qaýipsizdigin qamtamasyz etý úshin Eýropa astanasynyń kóshelerine Belgııa áskerı patrýlderi ornalastyrylady, dep habarlaıdy Kazinform agenttiginiń Brıýsseldegi tilshisi.
Qorǵanys mınıstri Teo Franken bul týraly osy aptada Belgııa parlamentinde málimdedi. Úsh aılyq merzimge eń kóbi 200 ásker ornalastyrý josparlanǵan. Osydan keıin ásker sany 90-ǵa deıin qysqarady.
Áskerı kúshter evreı qaýymdastyqtary oryndaryn kúzetedi, ol úshin Belgııa Federaldy polıtsııasynyń bas komıssary Polıtsııa týraly zańǵa sáıkes armııa jumyldyrdy. Keıin temirjol polıtsııasyn qoldaý jáne esirtkige baılanysty zorlyq-zombylyqpen kúresý úshin tolyq aýqymdy ıntegratsııalanǵan polıtsııa operatsııalaryna (FIPA) qatysý sııaqty basqa mindetterge keńeıtiledi.
Frankenniń aıtýynsha, kontıngent bir ýaqytta jumys isteıtin eń kóbi 200 áskermen shekteledi.
— Úsh aıdan keıin ásker sany toqsanǵa deıin qysqarady. Biz dúısenbi kúni Brıýssel men Antverpende bastaımyz, sodan keıin operatsııany Lejege deıin keńeıtemiz, — dedi mınıstr.
Sonymen qatar, Belgııanyń Qorǵanys mınıstrligi Belgııa armııasyna belsendi túrde ásker jınaý jumystary júrip jatqanyn habarlady.
Bul sharalar Lejdegi sınagogaǵa jasalǵan shabýyldan keıin qabyldandy, ony el bıligi antısemıttik áreket dep atady.
Budan buryn Belgııanyń Lej qalasyndaǵy sınagogada jarylys bolǵanyn jazdyq.
