Áskerıler Arys qalasynda halyqty qalaı evakýatsııalaýda
Taraǵan vıdeodan dál jarylys kezinde bir top áskerı qyzmetshiniń qutqarý jumystaryn júrgizip jatqanyn kórýge bolady. Áskerıler adamdardy jetelep, olardy jolda ketip bara jatqan kez kelgen kólikke otyrǵyzyp jiberýge asyǵady. «Alyp ket áıeldi, alyp ket» degen daýystar estiledi.
Adamdardy qutqarý kezinde jarylystyń áli de gúrsildep jatqanyn kórýge bolady. «Gúrs» etken jarylystan bir sátke jata qalyp qorǵanǵan áskerıler birden iske kirisip, qutqarý jumysyn jalǵastyrýda.
Búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy.Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.
QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.
QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.
Sońǵy málimetter boıynsha, oqıǵa saldarynan 11 adam zardap shekti.
