Áskerıler arasyndaǵy jemqorlyq edáýir azaıdy - Erǵalı Merzadınov

ASTANA. QazAqparat - Áskerı kúsh qurylymdarynda sybaılas jemqorlyq qylmystarynyń sany 25%-ǵa tómendedi. Bul týraly Bas áskerı prokýror Erǵalı Merzadınov áskerı prokýratýra organdarynyń jartyjyldyq jumysynyń qorytyndysyna arnalǵan alqa májilisinde málim etti.

Erǵalı Merzadınovtiń sózi boıynsha, bıyl áskerı vedomstvolarmen birlese, «Áskerdegi quqyq buzýshylyqtardy aldyn alýdyń 2016-2018 jyldarǵa arnalǵan baǵdarlamasy» qolǵa alynǵan. Onyń aıasynda qabyldanǵan sharalardyń nátıjesinde ásker qataryndaǵy qylmys deńgeıi 21%-ǵa azaıǵan. Sondaı-aq, áskerı qylmystar - 22%-ǵa, olardyń ishinde jarǵydan tys qarym-qatynastar tórt ese, al áskerı basshylardyń qol jumsaý faktileri bir jarym esege azaıǵanyn kórsetti.

«Sybaılas jemqorlyq qylmystarynyń sany - 25%-ǵa, ofıtserler jasaǵan qylmystar - 30%-ǵa, naqty merzimdegi áskerı qyzmetkerler jasaǵan qylmys - 71%-ǵa, al shartty negizdegi áskerıler jasaǵan qylmys sany 17%-ǵa kemigen», - dedi ol.

Sonymen qatar, Bas áskerı prokýror áskerı qyzmetshilerdiń ómiri men densaýlyqtaryna, ózine-ózi qol jumsaý oqıǵalaryn aldyn alý máselelerine toqtaldy. Oǵan qosa, ol qarý men oq-dárilerdiń aınalymyn baqylaýdy kúsheıtý, áskerı nysandardyń qaýipsizdigin tıisti dárejede uıymdastyrý qajettigine jiti nazar aýdardy.

Alqa otyrysy barysynda Erǵalı Merzadınov, áskerı qyzmetkerlerdiń quqyqtyq mádenıeti men quqyqtyq sanasyn qalyptastyrý arqyly qoǵamnyń quqyq qorǵaý organdaryna degen senimin arttyrý boıynsha jumysty jalǵastyrýdy tapsyrdy.

Májilis jumysyna Bas áskerı prokýratýranyń janyndaǵy zańdylyqty qamtamasyz etý máseleleri jónindegi Konsýltatıvtik keńesiniń ókilderi, «Áskerı zańgerler Alıansy» qoǵamdyq uıymynyń ókilderi, aımaqtyq jáne garnızondyq áskerı prokýrorlar qatysty.