Áskerıler Almatydaǵy klassıkalyq parashıýt sportynyń jeńimpazy atandy
Oral qalalaryndaǵy aeroklýb parashıýtshileri birneshe kún boıyna respýblıkalyq birinshilik úshin synǵa túsken bolatyn. Áskerı-áýe kúshteriniń Almatydaǵy bazasynda ótken jarys Qazaqstan Qarýly Kúshteriniń chempıonaty jáne klassıkalyq parashıýt sporty boıynsha jeke komandalyq chempıonaty syndy eki baǵytta órbip, oǵan barlyǵy 15 komanda qatysty.
Jarys barysynda sportshylar 1000 metrlik bıiktikten jeke jáne top bolyp sekirýdi, sondaı-aq 2000 metr bıiktikten akrobatıkalyq fıgýralar boıynsha sekirýdi oryndady. Al chempıonatqa tórelik jasaý elektrondy júıe kómegimen baǵalaý arqyly júrgizilgen bolatyn. Upaı sandary boıynsha QR Qarýly Kúshteriniń absolıýtti chempıony ataǵyn QR Qarýly Kúshteri Parashıýt daıyndyǵy ortalyǵynyń áskerı qyzmetshileri jeńip aldy.
Sonymen qatar, erler arasynda ótken jeke jarysta eki birinshiliktiń de chempıon ataǵyna atalmysh ortalyqtyń bólimshe bastyǵy aǵa praporşık Vıacheslav Lı laıyq dep tanyldy. Al áıelder arasynda birinshi oryndy Ortalyqtyń sporttyq komandasynyń nusqaýshylary praporşıkter Natalıa Nıkolaeva men Bıbigúl Ramazanova jeńip aldy. Sondaı-aq, jasóspirimder arasynda ótken chempıonatta da birinshi oryndy osy Ortalyqtyń sportshysy kishi serjant Denıs Islamov ıelendi.
«Klassıkalyq parashıýt sporty boıynsha chempıonattyń basty maqsaty Qarýly Kúshterde áskerı-qoldanbaly mańyzǵa ıe parashıýt sportyn damytý. Jarysqa qatysý arqyly parashıýtshiler ózderiniń sporttyq-tehnıkalyq sheberlikterin damytyp, halyqaralyq jarystarda jeńiske jetýge degen umtylystaryn arttyrady», - deıdi QR QK Parashıýt daıyndyǵy ortalyǵynyń bastyǵy, bas jattyqtyrýshy maıor Leonıd Dýdkın.