14 metr tereńdikte tikushaqtyń synyqtary men máıit anyqtaldy - Qorǵanys mınıstrligi
ASTANA. KAZINFORM – Shuǵyl aqparatty QR Qorǵanys mınıstrliginiń baspasóz qyzmeti taratty.
Baspasóz qyzmetiniń málimetterine qaraǵanda, oqıǵa bolǵan alǵashqy saǵattardan bastap Qorǵanys mınıstrliginiń basshylyǵymen táýlik boıy barlyq qajetti kúshter men quraldardy jumyldyra otyryp, izdestirý-qutqarý operatsııasy júrgizilýde.
Qorǵanys mınıstrligi, TJM, ІІM jáne basqa da vedomstvolardyń birlesken jumysy aıasynda, «Qazaqstan Ǵarysh Sapary» aktsıonerlik qoǵamynyń qoldaýymen spýtnıktik derekterdi paıdalana otyryp, matematıkalyq esepteýler júrgizildi.
Bul tikushaqtyń yqtımal ornalasqan aýmaǵyn anyqtaýǵa múmkindik berdi. Atalǵan aýdanǵa jedel túrde izdeý toptary men arnaıy tehnıka jóneltildi.
Sý astyndaǵy jumystar barysynda QR Qarýly Kúshteriniń áskerı qyzmetshileri shamamen 14 metr tereńdikte áýe kemesiniń ishinara synyqtary men bir adamnyń máıitin anyqtady.
Qazirgi ýaqytta sáıkestendirý protsedýrasy júrgizilip jatyr.
-Laı sý saldarynan sý astyn kórý qıyn bolyp otyr. Sol sebepti izdeý jumystary qıyndap barady. Bul jaǵdaı súńgýirler men ınjenerlik bólimshelerdiń jumysyn da aıtarlyqtaı baıaýlatady. Qıyn jaǵdaıǵa qaramastan, jumyldyrylǵan barlyq kúshter operatsııany múmkindiginshe tez aıaqtaý úshin úılesimdi ári maqsatty túrde áreket etip jatyr, -delingen habarlamada.
Aıta keteıik, 25 shildede Almaty oblysynda josparly ushý barysynda Qarýly kúshteri Áýe qorǵanysy kúshteriniń EC-145 tikushaǵy radardan joǵalyp ketken.
Bir kúnnen keıin joǵalǵan tikushaqtyń bólshekteri tabylǵany belgili boldy.