Áskerılendirilgen temir jol kúzeti: beınebaqylaýmen jabdyqtaýǵa bólingen 159 mln teńgeni jymqyrǵandar sottaldy
ASTANA. KAZINFORM – Astana qalasynyń qylmystyq ister jónindegi aýdanaralyq sotynyń «Áskerılendirilgen temir jol kúzeti» JShS bas dırektory B.Nahanov, onyń orynbasary A.Mýkataeva jáne JShS bas menedjeri R.Sıdıkovqa qatysty asa iri kólemde qarjy jymqyrǵany úshin aıyptaý úkimi zańdy kúshine engenin habarlady.
«Sot talqylaýy barysynda sottalýshylar temirjol stantsııalary úshin beınebaqylaý jabdyqtaryn satyp alý jáne montajdaý boıynsha affılıırlengen kompanııalarmen sharttar jasasý jolymen ózderine senip tapsyrylǵan 159 mln teńgeden astam aqsha qarajatyn urlaǵany úshin aıyptaldy. Qylmys dáleldendi», — delingen habarlamada.
Prokýratýranyń dereginshe, is júzinde jabdyq tolyq jetkizilmegen, tehnıkalyq sıpattamalarǵa saı kelmeıtin bolyp shyqqan.
«Sıdıkov baqylaýdaǵy kásipkerlerdi taýyp, beınebaqylaý júıelerin óz betinshe ornatqan. Nahanov pen Mýkataeva qabyldaý aktilerine qol qoıyp, aıqyn zań buzýshylyqtarǵa qaramastan merdigerlerge tólem jasaǵan», — dep habarlady prokýratýradan.
Sottalǵandar ómir boıyna memlekettik qyzmette jumys isteý quqyǵynan aıyra otyryp, 7 jyldan 8 jylǵa deıin ártúrli merzimge bas bostandyǵynan aıyryldy. Sot sottalǵandardan keltirilgen shyǵyndy da óndirdi.
