«Áskerılendirilgen temirjol kúzetiniń» qyzmetkerleri qymbat emge muqtaj 10 jasar Gúlnázǵa bir kúndik jalaqylaryn aýdardy
Bul týraly kompanııanyń baspasóz qyzmetinen málim etti.
AQ-nyń Qaraǵandy qalasyndaǵy fılıalynyń Aqadyr stansasyndaǵy atqyshtar komandasynyń qyzmetkeri Meıramqul Shaıkóılekovtiń qyzy Gúlnáz týǵanynan óte sırek kezdesetin aýrýǵa shaldyqqan. Dárigerler oǵan «Fıbrozdy osteodısplazııa. Polıossaldy zaqymdaný. Olbraıt aýrýy» dıagnozyn qoıǵan.
Ata-ananyń sózine qaraǵanda, syrqat saldarynan balanyń qol-aıaqtarynyń súıekteri jıi synady. Qazirgi ýaqytta synýlardyń sany onǵa jýyqtaǵan, kishkentaı Gúlnázdyń bútin denesi symdarmen bekitilgen. Balaǵa asa qymbat ota qajet, ony tek shet elde ǵana jasaıdy, atap aıtqanda, Izraılde. Emdeý quny 100 myń AQSh dollaryn quraıdy.
«Áskerılendirilgen temirjol kúzeti» AQ Gúlnáz ben onyń ata-anasynyń qaıǵysynan shet qalmaı, jalpy jınalysta árbir qyzmetker qyz balanyń emine bir kúndik jalaqysyn aýdaratyn bolyp sheshildi. AQ qyzmetkerleri Gúlnázdyń syrqatynan aıyǵyp ketýine shyn júrekten tilektes», - delingen taratylǵan baspasóz aıǵaǵynda.
«Qazaqstan temir joly» ulttyq kompanııasy» AQ-nyń enshiles kompanııasy «Áskerılendirilgen temirjol kúzeti» AQ temirjol kóligimen tasymaldanatyn júkterdiń saqtalýyn qamtamasyz etý boıynsha praktıkalyq tájirıbesi mol jáne damyǵan ınfraqurylymy, áleýeti zor mamandandyrylǵan kúzet bólimshesi bolyp tabylady. Qazaqstan Respýblıkasyndaǵy eń iri jáne jetekshi kúzet kompanııasy. Elimizdiń oblys ortalyqtarynda 10 fılıaly jáne temirjol stansalarynda 92 atqyshtar komandasy ornalasqan. Kompanııa on úsh myńnan astam adamdy jumyspen qamtyp otyr.