Áskerılendirilgen apattyq-qutqarý qyzmeti úıi sýǵa ketken aqtóbelikterge aqsha aýdardy
Kóktemgi tasqyn kezinde Aqtóbede 771 úı sýǵa ketti. 81 úı qulap qalǵan. Qalalyq ákimdik tóbesi ortasyna túsken úılerdi tizimge alyp, ıelerine páter men jer telimin usyndy. Páterdi 6 otbasy aldy. Olarǵa «Turǵyn úı qurylys jınaq bankinen» esepshot ashyp, 300-500 myń teńge kóleminda aqsha salyndy. Páter alǵandar aldaǵy úsh jylda osy esepshotqa aqsha jınaýy tıis. Bul alǵashqy jarna bolady.
Al jer telimi Sazdy, Qýraıly, Órleý, Qyzyljar aýyldarynan tıdi. Sonymen qatar olardyń árqaısysy 1 mıllıon teńgeden sertıfıkat aldy. 800 myń teńgesine qurylys materıaly berilip, 200 myń teńgesine qurylys jumystary júrgiziledi. Qazir memleket tek jer telimin berip, qajetti qarjynyń bári «Qolǵanat Aqtóbe» qorynan aýdarylyp jatyr. Sonymen qatar, jomart jandar men ujymdar óz kómegin usynýda. Búgin qalaǵa Investıtsııalar jáne damý mınıstrliginiń «Kásibı áskerılendirilgen apattyq qutqarý qyzmeti» kásiporyny ujymynan 4 mıllıon 500 myń teńge jetti.
«Kimge qandaı kómek qajet degen suraqpen ákimdikke júgindik. Olar tizimin berdi. Bizdiń jumysshylar kómek berý qajet ekenin túsinip, árqaısysy aqsha bóldi. Ujymda 3 myńnan astam adam eńbek etedi. Barlyǵy 8 fılıaldyń jumysshysy ózge aımaqqa kómek berdi. Qalǵany Aqtóbege qol ushyn sozdy», - dedi QR Investıtsııalar jáne damý mınıstrliginiń ındýstrııalyq damý jáne ónerkásiptik qaýipsizdik Komıtetiniń «Kásibı áskerılendirilgen apattyq-qutqarý qyzmetiniń» RMK bas dırektory Bolat Halyq. Ujym baspanasy sýda qalǵandarǵa 150-den 500 myń teńgege deıin qarjy berdi.
«Úıim turýǵa kelmeıdi. Bir aı ótse de baǵalaýshylar kelmedi. Osy máseleni aıtqan kezde ákimdik «úlgere almaı jatyrmyz» dep aıtty. Sodan sýretin surady. Men 500 myń teńge suraǵan edim. Búgin sýretke qarap 300 myń teńge berdi. Jer alýǵa aryz jazyp qoıdym», - dedi 4 balanyń anasy, oralman Saldathan Myrzabaeva.
Aıta keteıik, qazirgi ýaqytta 240 otbasyǵa 23 mıllıon teńgeden astam qarjy qolma-qol berilgen. Bul jóndeý jumystaryna bólingen aqsha.