Áskerı joǵary oqý ornynyń 160-tan asa túlegi ofıtserlik qyzmetke kirisedi
ASTANA. KAZINFORM — Almaty qalasyndaǵy Saǵadat Nurmaǵambetov atyndaǵy Qurlyq áskerleri áskerı ınstıtýtynda jas ofıtserlerdiń saltanatty oqý bitirý rásimi ótti, dep habarlaıdy QR Qorǵanys mınıstrliginiń baspasóz qyzmeti.
Іs-sharaǵa Qorǵanys mınıstrliginiń ókilderi, ınstıtýt basshylyǵy men professorlyq-oqytýshylyq quram, Qarýly kúshter ardagerleri, sondaı-aq túlekterdiń ata-analary men jaqyndary qatysty.
Jas leıtenanttardy Qarýly kúshteri Bas shtaby bastyǵynyń birinshi orynbasary general-maıor Asan Júsipov quttyqtap, olarǵa Otanǵa adal qyzmet etý, áskerı antqa berik bolý jáne Qazaqstan armııasynyń úzdik dástúrlerin jalǵastyrý mindetin júktedi.
Saltanatty rásim barysynda 163 túlekke alǵashqy ofıtserlik pogon tabystaldy. Olardyń ishinde UQShU jelisi boıynsha bilim alǵan úsh túlek oqýyn aıaqtaǵan soń Qyrǵyz Respýblıkasynyń Qarýly kúshterinde qyzmetin jalǵastyrady.
Bıylǵy jyldan bastap zańnamaǵa sáıkes, úzdik bitirgen túlekterge «aǵa leıtenant» áskerı sheni beriledi. Bul ataqqa Qurlyq áskerleri áskerı ınstıtýtynyń úsh túlegi — Ernar Áshimhanov, Nurdáýlet Murat jáne Arman Undasynov ıe boldy. Olarǵa pogondardy Astanada ótken Memlekettik rámizder kúnine arnalǵan saltanatty sharada Prezıdent tabystady.
Sharanyń kórkin 100 dombyrashydan quralǵan ansambldiń oryndaýyndaǵy ulttyq kúıler asha tústi. Al jas túlekterdiń ofıtserlik valsi saltanatqa erekshe kóńil-kúı syılady.
Aldaǵy ýaqytta áskerı ınstıtýt túlekteri Qazaqstan Qarýly kúshteriniń bólimderinde qyzmet atqaryp, bólimshelerdi basqaryp, jeke quramdy daıarlaý jáne jaýyngerlik daıyndyqty jetildirý isine óz úlesin qosady.
Buǵan deıin bolashaq ofıtserler áskerı bólimderde taǵylymdamadan ótkenin jazdyq.
