Áskerı joǵary oqý oryndaryn úzdik bitirgen túlekterge áskerı ataq berý tártibi ózgerdi
ASTANA. KAZINFORM — 19 mamyrda Memleket basshysy «Qazaqstan Respýblıkasynyń memlekettik qyzmet máseleleri boıynsha keıbir zańnamalyq aktilerine ózgerister men tolyqtyrýlar engizý týraly» zańǵa qol qoıdy.
Osy zańdy júzege asyrý maqsatynda «Áskerı qyzmet jáne áskerı qyzmetshilerdiń mártebesi týraly» zańǵa tolyqtyrýlar ázirlendi. Bul ózgerister oqýyn támamdaǵan kýrsanttarǵa áskerı ataq berý tártibine qatysty bolyp otyr.
Qazaqstannyń jáne shet memleketterdiń áskerı, arnaýly oqý oryndarynda joǵary bilim berý baǵdarlamalary boıynsha kúndizgi oqý nysanyn úzdik bitirgen túlekterge budan bylaı «aǵa leıtenant» áskerı ataǵy beriledi. Sonymen qatar, olarǵa qyzmet ornyn óz qalaýy boıynsha tańdaý quqyǵy berilmek.
Atalǵan normalardy «Áskerı qyzmet jáne áskerı qyzmetshilerdiń mártebesi týraly» zańǵa sáıkestendirý úshin «Qazaqstan Respýblıkasynyń Qarýly Kúshterinde, basqa da áskerleri men áskerı quralymdarynda áskerı qyzmet ótkerý qaǵıdalaryn bekitý týraly» Qazaqstan Respýblıkasy Prezıdentiniń 2006 jylǵy 25 mamyrdaǵy № 124 Jarlyǵyna ózgerister men tolyqtyrýlar engizý týraly» Jarlyq jobasy daıyndaldy.
Memleket basshysy Jarlyǵynyń jobasy úzdik túlekterge «aǵa leıtenant» áskerı ataǵyn berýdiń jańartylǵan tártibin zańdy túrde bekitedi. Bul zańnamalyq jańashyldyq áskerı qyzmetshilerdiń áleýmettik kepildikterin nyǵaıtyp, kýrsanttardyń oqýda jáne qyzmette joǵary nátıjelerge qol jetkizýge degen yntasyn arttyra túspek.
Aıta ketelik Prezıdent qarýly kúshter men áskerı mekemelerdi túbegeıli reformalaý kerek ekenin aıtqan edi.
