Áskerı jıyn bólimsheleri qaı óńirlerde qurylady
Onyń aıtýynsha, áskerı jıyndar Qarýly Kúshter Bas shtabynyń kelisimimen jáne ákimderdiń sheshimimen eki jylda bir ret ótip turady.
«Jıyn ótkizýge oblys pen respýblıkalyq mańyzy bar qala basshylarynyń sáıkes qaýlysy negiz bola alady. Odan ózge akt qabyldaýdyń qajeti bolmaıdy. Biraq, elimizge alǵash ret engizilgen tótenshe jaǵdaı kezeńinde Qarýly Kúshterdiń kez kelgen áreketi Memleket basshysynyń sheshimi negizinde júrgizilýi tıis. Sondyqtan, arnaýly jıyn ótkizý týraly Jarlyq qajet boldy», - dep túsindirdi Serik Boranbaev Ortalyq kommýnıkatsııalar qyzmetinde ótken brıfıngte.
Onyń aıtýynsha, Jarlyqqa qaramastan, áskerı mindettilerdi arnaýly jıynǵa shaqyrý birneshe óńirde ǵana josparlanyp otyr.
«Jarlyq ákimderdi aýmaqtyq áskerdi tolyq kólemde qurýǵa mindettemeıdi, tek qana sondaı quqyq beredi. Qazirgi ýaqytta Nur-Sultan, Almaty qalalarynda, Almaty, Qyzylorda, Pavlodar, Aqmola oblystarynda arnaýly jıyn bólimsheleri quryldy. Aqtóbe, Atyraý oblystarynda áskerı mindettilerdi shaqyrý jalǵasýda. 13 sáýir kúni Shymkent qalasy men Qaraǵandy oblysynda, 14 sáýirde - SQO, 15 sáýirde - Jambyl, 17 sáýirde - Túrkistan oblysynda shaqyrý bastalady. Al BQO, ShQO, Qostanaı jáne Mańǵystaý oblystarynda arnaýly jıyn ótkizý máselesi qarastyrylmaǵan», - dedi S. Boranbaev
Sonymen birge, spıker Prezıdent Jarlyǵyn áskerı mindettiler ǵana emes, el azamattarynyń kópshiligi oń qabyldaǵanyn jetkizdi.
«Jarlyq shyqqan soń tótenshe jaǵdaı kezinde aýmaqtyq ásker qataryna qosylǵysy kelgen azamattar habarlasty. Erteńgi kúni-aq barlyq óńirde jergilikti áskerı basqarý organdaryna eriktiler kele bastady. Jarlyqqa sáıkes, shaqyrý merzimi men shaqyrýshylar sanyn ákimdikter retteıdi, sondyqtan shaqyrý josparlanǵan ákimdikterge túsindirý jáne uıymdastyrý jumystary júrgizildi», - dedi QR QK Bas shtab ókili.
Aıta keteıik, 2 sáýir kúni Memleket basshysy Qasym-Jomart Toqaev áskerı mindettilerdi arnaýly jıynǵa shaqyrý týraly Jarlyq shyǵarǵan edi.
