Áskerı jıynǵa kimder shaqyrylady jáne kimder bosatylady
ASTANA.KAZINFORM — Qorǵanys mınıstriniń buıryǵyna sáıkes osy jyly josparly oqý-jattyǵý jıyndaryna zapastaǵy úsh myń áskerı mindetti tartylady.
Atalǵan is-sharalar rezervtegilerdiń daıarlyq deńgeıin jetildirý, praktıkalyq daǵdylardy jańartý, zamanaýı qarý-jaraq pen áskerı tehnıkany meńgerý, sondaı-aq Qarýly kúshterdi jumyldyrýdyń daıyndyq deńgeıin arttyrý maqsatynda uıymdastyrylady.
Qatysýshylardy irikteý jergilikti áskerı basqarý organdary tarapynan armııanyń naqty áskerı-eseptik mamandyqtary boıynsha qajettilikterine sáıkes júzege asyrylady. Bul rette daıyndyq deńgeıi, densaýlyq jaǵdaıy jáne zańnamada belgilengen ózge de talaptar eskeriledi.
Azamattar arnaıy shaqyrtý negizinde shaqyrylady. Ony alǵan tulǵalar kórsetilgen orynǵa belgilengen merzimde kelýge mindetti. Kelmegen jaǵdaıda bes aılyq eseptik kórsetkish mólsherinde ákimshilik jaýapkershilik qarastyrylǵan.
— Zańnamaǵa sáıkes, bul is-sharalarǵa tartylmaıtyn azamattar sanaty aıqyndalǵan. Olardyń qatarynda oqý jyly kezeńindegi pedagogtar, kúndizgi bólimde bilim alýshylar, kámeletke tolmaǵan úsh jáne odan da kóp balasy bar ata-analar, sondaı-aq «Áskerı qyzmet jáne áskerı qyzmetshilerdiń mártebesi týraly» zańda kózdelgen ózge de sanattar bar, — delingen mınıstrlik habarlamasynda.
Daıyndyq merzimi bir aıǵa deıin sozylady. Osy ýaqyt aralyǵynda qatysýshylar azyq-túlikpen, kıim-keshekpen jáne medıtsınalyq qyzmetpen qamtamasyz etiledi. Jattyǵý ótetin orynǵa barý jáne keri qaıtý Qorǵanys mınıstrliginiń esebinen uıymdastyrylady.
Memleket tarapynan áleýmettik kepildikter qarastyrylǵan. Azamattardyń jumys orny men atqarǵan qyzmeti saqtalady. Jumys isteıtinderge zańnamaǵa sáıkes ortasha jalaqy tólenedi, al jumyssyz azamattarǵa bıýdjet qarajaty esebinen eń tómengi jalaqy beriledi. Jıyn ýaqyty jalpy eńbek ótiline eseptelip jazylady.
Josparly oqý-jattyǵý jıyndary «Áskerı qyzmet jáne áskerı qyzmetshilerdiń mártebesi týraly» zańnyń 33-baby 1-tarmaǵyna sáıkes ótkiziledi jáne eldiń jumyldyrý rezervin daıarlaýdyń mańyzdy bóligi bolyp tabylady.
Aıta ketelik Qorǵanys mınıstrligi qazaqstandyqtarǵa aldaǵy áskerı oqý-jattyǵýlar týraly eskertken edi.
