Áskerı jáne arnaıy kıimderdi erkin saýdalaýǵa shekteýler qoıylady - E. Dosaev
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qujattyń maqsaty saýda qyzmetin memlekettik retteýdiń ádisteri men nysandaryn júıelendirý, elektrondyq saýda salasyndaǵy kásipkerlik sýbektileriniń qyzmetin odan ári jetildirý bolyp otyr. Sonymen qatar, zań jobasynda elimizdiń syrtqy saýdany retteý salasyndaǵy zańnamasyn halyqaralyq sharttarǵa, sonyń ishinde Keden odaǵy men DSU normalaryna sáıkestendirý kózdeledi.
«Zań jobasynyń aıasynda arnaıy kıimderdi paıdalaný arqyly quqyq buzýshylyqtar, qylmystar jasaýdy tejeý sharalary qamtylyp otyr. Atap aıtqanda, áskerı jáne arnaıy kıimder, nysandy kıimderge jatatyn taýarlardy erkin saýdada satýǵa shekteýler belgilenedi», dedi Ulttyq ekonomıka mınıstri Erbolat Dosaev.
Budan bólek, zań jobasynda elektrondyq saýdany júzege asyrý barysynda satýshynyń, onyń ishinde satýshynyń ózi týraly aqparat berý mindeti qarastyrylyp otyr. Sonymen qatar, elektrondyq saýda barysynda tutynýshylardyń quqyqtaryn qorǵaý normasy qamtylady.
