Áskerı-úıretilgen rezerv baǵdarlamasy boıynsha azamattardy aqyly negizde daıyndaý bastaldy

ASTANA. 24 naýryz. QazAqparat - Qorǵanys mınıstrligi azamattardy aqyly negizde áskerı-úıretilgen rezervke daıyndaýdy bastady, dep habarlady QR Prezıdenti janyndaǵy Ortalyq kommýnıkatsııalar qyzmeti atalǵan vedomstvonyń baspasóz qyzmetine silteme jasap.

Daıyndyq Qorǵanys mınıstrliginiń «Áskerı-tehnıkalyq mektep» respýblıkalyq memlekettik qazynalyq kásiporyndary fılıaldarynyń bazasynda ótkiziledi.

«Atalǵan daıyndyq túri dástúrli merzimdi qyzmetke ózindik balama bolmaq. Azamattardy oqýǵa irikteýdi jergilikti áskerı basqarý organdary júzege asyrady. Eki kezeń boıynsha: naýryz-maýsym, qyrkúıek-jeltoqsan aılary boıynsha oqytý belgilendi», delingen habarlamada.

2013 jyly aqyly negizde barlyǵy 3000 azamatty oqytý josparlanǵan. Bir aı oqyǵan merzim ishinde azamattar teorııalyq bilimderin tájirıbe júzinde ushtastyrady. Ol úshin Qarýly Kúshter áskerı bólimderiniń polıgondary men tırlerinde jattyǵýdan ótip, qarý-jaraq, áskerı tehnıka jáne áskerı qyzmetshilerdiń kúndelikti tynys-tirshiligimen tanysatyn bolady.

"Áskerı úıretilgen rezervti tólep oqytý-úıretý baǵdarlamasy boıynsha 210 myń teńge qarjy belgilengen. Áskerı isti úırenip, Otan qorǵaýǵa ázir bolýdy qalaıtyn áskerge shaqyrylýshylar az emes, olar sonymen birge atys qarýynan atýdy oqyp úırenýge, ony qoldanýdy meńgerýge de yntaly», - dep atap kórsetiledi habarlamada.