Áskerı ushqyshtar Jeńistiń 70 jyldyǵyna daıyndyqty bastady
Qazirgi ýaqytta óner kórsetý jospary ázirlenýde, bul barlyq soǵys ardagerleri úshin ózgeshe syılyq, sondaı-aq qazaqstandyq áskerı ushqyshtar jaýyngerlik ázirliginiń kórsetkishi bolady.
Áskerı qyzmetshiler mereıtoı qurmetine aspanda ushaqtarmen «70» sanynyń beınesin túzep ushý ıdeıasyn usyndy. Budan bólek, ushqyshtar joǵary pılotajdyń túrli fıgýralaryn oryndaıtyn bolady. Solardyń biri - ataqty «Nesterov tuzaǵy».
«Bir ushaqpen osy fıgýrany oryndaý asa kúrdeli emes, alaıda ony top quramynda jasaý barynsha bilimdi, sheberlik pen tájirıbeni qajet etedi. Óıtkeni, birneshe ushaq birlesip birdeı qozǵalýy tıis. Sondyqtan da, ushqyshtar top quramyndaǵy ushýlarǵa kiriserdiń aldynda teorııalyq jáne praktıkalyq daıyndyq kýrsynan ótedi», - deıdi maıdan avıatsııasynyń ushqyshy podpolkovnık Nurlan Orazov.
2007 jyldan beri ol is júzinde barlyq áskerler paradtaryna qatysyp keledi. «Aldaǵy bolar is-sharany biz asyǵa kútemiz. QR QK Áýe qorǵanysy kúshteri daıyndaǵan baǵdarlama ardagerler úshin erekshe syılyq jáne barsha jurtqa este qalarlyq kórinis bolatynyna senemiz», - deıdi Nurlan Orazov.
Qazirgi ýaqytta QR QK Áýe qorǵanysy kúshteriniń sapynda Sý-25, Sý-27, MıG-23, MıG-27, MıG-29, MıG-31 sııaqty qýatty jaýyngerlik ushaqtar bar. Al bul qýatty jaýyngerlik mashınalardy qatary jyl saıyn eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteri áskerı ınstıtýtynyń túlekterimen tolyǵyp otyratyn tájirıbeli ushqyshtar basqarady.
